Дондағы Ростовта Ресей шекара әскерлерінің ғимараты отқа оранды
ДОНДАҒЫ РОСТОВ. 16 наурыз. Бүгін түс ауа Ресейдің Дондағы Ростов қаласында ФСБ шекарашылар басқармасының ғимараты лаулаған өрттің жалыны астында қалды. Бұл туралы ресейлік ресурстар дерегіне сүйенген rast.kz хабарлайды.
«161.RU» сайтының куәгерлері Ресей Федерациясы федералды қауіпсіздік қызметі (ФСБ) шекара әскерлері басқармасы ғимаратының жанғанын өз көздерімен көргендерін айтып берді. Куәлардың сөздеріне қарағанда, кеңсе ғимараты жақтан әлдененің жарылған даусы да естілген.
«Baza» телеграм-каналының мәліметіне қарағанда, жарылыс шекара әскерлері басқармасының қоймасы жақта орын алған сияқты. SHOT онда оқ-дәрілер болуы мүмкін екенін жазады.
«Медиазона» порталының атап өткеніндей, Ростов облысының губернаторы Василий Голубев өзінің телеграм-каналында өрттің тұтануына ғимарат ішіндегі электр сымдарының тұйықталуы себеп болуы да ықтимал екенін атап өткен. Оның айтуынша, өрт «шекара әскерлері басқармасының шаруашылық баспанасында» болған, соның салдарынан жанар-жағар май ыдыстары атылған.
Алдын ала болжам бойынша, өрт 800 шаршы метрді жайлаған. Өртті сөндіруге 14 техника бірлігі мен 63 құтқарушы қатысқан. Бір адамның зардап шеккені анықталып отыр.
Әзірге диверсия жайлы ешқандай да әңгіме айтылып отырған жоқ.
