USD
КИЕВ. 1 мамыр. Украина соңы екі аптаның көлемінде Туапседегі мұнай терминалына төртінші дүркін дүркірете соққы берді. Бұл туралы The Moscow Times ақпарына сүйенген rast.kz хабарлайды.
Украина Қарулы күштері 1 мамырға қараған түні Ресейдің Краснодар өлкесіндегі Қара теңіз жағалауына орналасқан Туапсе қаласындағы теңіз мұнай терминалына тағы да дрондармен күйрете соққы жасады.
Бұдан кейін терминалда қою түтін будақтай ұшқан өрт өрекпи басталды, оны 128 адам және 41 техника жабылып сөндірді. Краснодар өлкесінің жедел штабындағылар осындай ақпар таратты. Ешкім зардап шекпепті.
RTVI мәліметтері бойынша, шабуыл Туапсе мұнай өңдеу зауытының аумағындағы кем дегенде екі резервуарды өртеп жіберген. Таратылған рәсімдерде сол маңнан қалқып көтерілген қалың қара түтін көрінеді. Мәтбұғат терминалдың өзі қауқарсыз қалғанын, қалада электр қуатының жаппай дерлік өшіп қалғанын атап өтті. «Орталықта толық қара түс бар, сонымен қатар интернет жұмыс істемейді», деп жазады Z арналары.
Бұл соңғы екі аптадағы Туапседегі терминалға жасалған төртінші шабуыл болып отыр. 28 сәуірде болған алдыңғы өрттен кейінгі өрт бейсенбі күні, бір күн бұрын сөндірілді. Бұл жолы мұнай өңдеу зауытынан жанып жатқан мұнай өнімдері көшелерге төгілді.
Сондай-ақ, нысан 16 және 20 сәуірде соққыға ұшыраған. Екі рет өрт шамамен төрт күн бойы сөндірілді. Қалада «мұнай жаңбыры» болды, ауадағы бензол, ксилол және күйе концентрациясы нормадан бірнеше есе асып түсті. Түтін Сочи, Анапа, Армавир және Ставрополь аумақтарына дейін жетті. Бұған қоса, резервуарлардың зақымдануы өзен мен Қара теңізге түскен мұнай өнімдерінің ағып кетуіне әкелді. Бір апта ішінде дақ жағалау бойымен 77 шақырымға созылды.
Шабуылдарға байланысты «Роснефтьке» тиесілі және Ресейдегі ең ірі 10 зауыттың қатарына кіретін зауыт 16 сәуірден бастап жұмыс істемейді. Украина Қарулы күштері бас штабының мәліметі бойынша, зауытқа жасалған алғашқы екі шабуылда ғана 24 резервуар жойылып, тағы төртеуі бүлінген. Сондай-ақ, Ресей темір жолдары терминал бағытында жүктерді тасымалдауды 3 мамырға дейін шектеді.
