«Газпром» Орталық Азияның бірінші чемпионатына демеушілік жасайды
МӘСКЕУ. 15 наурыз. Ресейдің «Газпром» көпшілік акционерлік қоғамы футболдан Орталық Азия чемпионатына қаржылай көмек көрсетеді. Бұл туралы Metaratings.ru сайтының дерегіне сүйенген rast.kz хабарлайды.
«Газпром» Орталық Азия Футбол ассоциациясының (CAFA) 2023 жылдың маусым айында РФ құрамасының қатысуымен өтетін бірінші чемпионатына демеуші болады», – делінген хабарламада.
CAFA ұйымы 2014 жылы құрылған. Оған Ауғанстан, Иран, Қырғызстан, Тәжікстан, Түрікменстан және Өзбекстан федерациялары кіреді.
Турнир 9-21 маусымда Бішкек пен Ташкентте өтеді деп жоспарланып отыр. Оған сегіз құрама қатысады.
«Бүгінгі күні чемпионатқа қатысуға CAFA-ның алты мүшесінің бәрі – Ауғанстан, Иран, Қырғызстан, Тәжікстан, Түрікменстан және Өзбекстан қатысуға келісім беріп қойды», – деп жазады «Фергана» ресурсы.
Хабарланғандай, турнирге Ресей құрамасы да қатысқалы тұр. Бірақ одан әзірге өтінім келіп түскен жоқ. Айтуларынша, қазір бұл доданың «артықшылықтары мен кемшін тұстары талқыланып жатқан» көрінеді. Бірақ орыстардың мұндай мүмкіндікті әсте құр жібере қоймайтынын Азия ассоциациясының барлық дерлік мүшелері түсініп отыр.
Сонымен, сайысқа қатысатын соңғы, сегізінші команда тегінде Таиланд құрамасы болып қалатын түрі бар.
Турнирдің ережесі бойынша, сегіз команда төрт-төрттен екі топқа бөлініп ойнайды. Бір топтың ойындары – Ташкентте, екіншісінікі Бішкекте өтеді.
Топтардың жеңімпаздары финалда кездеседі. Ал өз квартетінде екінші болған командалар қола жүлдені өзара сарапқа салады. Бұл екі финалдық матч та Ташкентте ойналады.
Еске сала кетейік, ФИФА мен УЕФА Ресей армиясының Украинада жүргізіп жатқан басқыншылық соғысы салдарынан РФ-ның барлық жас мөлшерлеріндегі құрама командаларын 2022 жылдың көктемінен бері халықаралық жарыстардан аластатып тастаған болатын. Мұндай тыйым Ресейдің клубтық командаларына да қолданылып отыр.
Ескерту!
rast.kz сайтының кез келген материалын редакцияның арнайы рұқсатынсыз көшіріп алып жариялауға тыйым салынады. Плагиат жасаушы «Авторлық құқық туралы» Заңға сәйкес қудаланады.
