Оккупанттардың Херсон орталығын миналап кеткені белгілі болды
КИЕВ. 13 қараша. Херсон әкімшілігі Ресей оккупанттары миналап кеткендіктен, жұртты қаланың орталығына жиналмауға шақырып жатыр. Бұл туралы «Медуза» хабарлады.
Қазір қала орталығының барлық дерлік нүктелеріне мина көміліп кеткені анықталды. Ресейліктер кетер алдында Херсонның көптеген нысандарына жарылғыш заттар қойып үлгерген екен. Мұны облыстық әкімшілік басшысы Ярослав Янушевич Telegram-да арнайы жазып, атап көрсетті.
«Херсонның азат етілгенін тойлаудың бүгін екінші күні өтіп жатыр. Жұрт украин жалауларын ұстап, көшелер мен алаңға шығуда, қатты қуанысып жүр, Украина Қарулы күштеріне алғыстары шексіз. Бірақ мен олардың бәрін аз да болса сақ жүру керек екенін ескерткім келеді. Қазір жаудың барлық жерге бірдей көміп кеткен миналарын тауып алып, залалсыздандыру жұмыстары жүруде. Сондықтан мына нәрсені өтінемін: адамдар көп жиналған жерге бара бермеңіздер. Бұған қоса, ертең, 14 қараша күні қаланың орталығын минадан тазарту жұмыстары жүреді. Сол себепті қаланың орталығына келмеңіздер», – деп жазды ол.
Бұдан әрі Янушевич Херсон жерінің оккупациядан азат етілген бөлігінде газбен қамтамасыз ету қолға алынатынын айтты.
«Қазірдің өзінде облыстың азат етілген елді мекендерінде 300-ден астам үйге табиғи газ жеткізуді қалпына келтірудің орайы келді. Мамандар Херсонда газбен қамтамасыз етуді тұрақты ұстап тұр», – деді ол.
