Қазақстан қыздары Азия чемпионатында 3 алтын медаль жеңіп алды
АММАН. 11 қараша. Иорданияның байтағы – Амман қаласында өтіп жатқан бокстан Азия чемпионатында Қазақстанның әйелдер құрамасы қатарынан үш чемпион шықты. Бұл туралы rast.kz хабарлады.
Бүгін чемпионатта әйелдер арасындағы финалдық жекпе-жектер болып өтті.
Алтын медальды командаға жапон Като Хикаруды ұтқан Алуа Балқыбекова (48 кг), тай Жуматас Житпонгтен басым түскен Жайна Шекербекова (54 кг) және жапон Ирие Сенаны тізе бүктірген Карина Ибрагимова (57 кг) алып берді. Ал Гүлсая Ержан (81 кг) үнді Сауитиге ұпай санымен жол беріп, күміс медаль алды. Бұдан бұрын жартылай финалда жарыс жолынан шығып қалған Назым Қызайбай (50 кг), Жазира Орақбаева (52 кг), Мәдина Нұршаева (66 кг), Дариға Шәкімова (70 кг) және Ләззат Күнгейбаева (+81 кг) қола медальды қанағат тұтқан болатын.
Сөйтіп, 3 алтын, 1 күміс және 5 қола медаль жинаған Қазақстан командасы чемпионатта Үндістан құрамасынан кейінгі екінші сатыға орналасты.
Финалда Үндістан мен Жапонияның әрбірінің – 5, Қазақстанның – 4, Өзбекстанның, Кореяның және Таиландтың әрбірінің – 2, Тайпейдің, Вьетнамның, Моңғолияның және Иорданияның әрбірінің 1 спортшысы шайқасты.
Сонымен, финалда 4 алтын, 2 күміс және 2 қола медаль алған Үндістан құрамасы бірінші орынды жеңіп алды. Үшінші орынға жайғасқан Жапония командасынла 1 алтын, 4 күміс медаль бар. Содан кейінгі 4 орынға 1 алтын, 1 күміс және 4 қола медальды Корея, 5 орынға 1 алтын, 1 күміс және 1 қола медальды Өзбекстан командасы табан тіреді. Тайпей жасағында 1 алтын, 2 қола медаль болса, Вьетнамда 1 алтын, 1 қола медаль бар. Сол сияқты Таиланд – 2 күміс, 1 қола, Моңғолия 1 күміс, 4 қола, Иордания 1 күміс, 1 қола медаль алды.
Осылайша Қазақстан әйелдер құрамасы осының алдында Дубайда өткен құрлық чемпионатындағыдан айтарлықтай төмен нәтиже көрсетті. Онда біздің қыздар 8 алтын, 1 күміс және 1 қола медаль алып қайтқан еді.
