Запорожье облысында ресейлік «мобиктер» сиырларды жарып тастаған

ЗАПОРОЖЬЕ. 4 қараша. Ресей армиясына мобилизация жолымен Солтүстік Осетиядан келген 4 жігіт Запорожье облысында мас болып, біраз бейбастақтықтар жасаған. Бұл туралы Baza хабарлады.

Оқиға 30 қазан күні орын алған. Әуелі мас солдаттар Васильевка қаласындағы ферманың 13 сиырын жарып тастаған. Сосын ферманың егесін үйінен қуып жіберген.

Бұдан кейін «мобиктер» ферма қызметшілеріне тап беріп, оларды жаппай сабаған, соңынан жұмыс көлігін айдап кеткен. Ал жол бойындағы бекетте өздерін тоқтатқан Ресей армиясы жауынгерлеріне оқ жаудырып, жауап берген. Нәтижесінде бір сержантты жаралаған.

Соңынан төртеуі де қолға түскен. Жақын арада оларға айып тағылып, сот жүзінде жазаларын алады.

Ресей билігі бұған дейін мобилизациямен алынғандардың арақ ішіп, мас болып жүргендері жайлы бірнеше рет дабыл қаққан болатын. Әскерге шақырылушылардың осындай әрекеттеріне Екатеринбург тұрғындары біраз наразылық білдірді. Олардың айтуларынша, ішіп алған «мобиктер» жұртқа тиісіп, төбелес шығарып, қиғылық салған. Мұндай оқиға Забайкальеде де қайталанды.

Осыдан кейін Ресейдің бірнеше өңірінде арақ-шарап сатуға біршама шектеу қойылды.