Ыстанбұл аэропортында ұшақ апатқа ұшырады
ЫСТАНБҰЛ. 6 ақпан. Кеше сәрсенбі күні Ыстанбұлдың Сабихи Гёкчен атындағы аэропортында кешкі сағат 18:00 шамасында ұшу-қону белдеуінің сыртында жолаушылар ұшағы апатқа ұшырады. Бұл туралы Daily Sabah хабарлады.
Лайнер жерге қонып жатқан кезінде отқа оранған. Оның бортында сол кезде 171 жолаушы және экипаждың 6 мүшесі болған. Авиакомпания инцидент орын алғасын арада жарты сағаттан кейін ешкімнің қаза таппағанын мәлімдеген. Бірақ кейінірек елдің денсаулық министрі Фахреттин Кока 1 адамның қаза тауып, 157 жолаушының әртүрлі дене жарақатымен бірнеше ауруханаға жеткізілгенін баяндады. Зардап шеккендердің үшеуіне операция жасалған, тағы екеуі реанимацияда жатыр, алайда, олардың өмірлеріне тікелей қауіп жоқ. Аурухана жатқызылғандар арасында екі пилот бар, олардың ахуалдары ауыр.
Апатқа ұшыраған ұшақ бортында Түркияның 155 азаматы болған, сонымен бірге АҚШ, Қытай, Ирак, Израиль, Қырғызстан, Швеция, Сирия және Түрікменстан азаматтары ұшып бара жатқан екен.
Сурет кадрларына қарағанда, ұшақ апаттан кейін екі бөлікке бөлініп қалған сияқты. Ал CNN Turk мәліметіне қарағанда, Boeing 737 лайнері тіпті үшке бөлініп кеткен.
Ұшақ Pegasus Airlines компаниясының меншігі екен. Ол Ыстанбұлға Измирден ұшып келе жатқан. Әуе кемесінің пайдаланылып келе жатқанына 11 жыл болыпты.
«Лайнер нашар ауа райы жағдайында қондырылды, елірген желмен бірге жаңбыр селдетіп құйып тұрды», деп жазады «Интерфакс». Ыстанбұл қаласының губернаторы ұшақтың жерден 30-40 метр биікте келе жатқанда жылдамдығын жоғалтып алып, іс жүзінде белдеуге құлап түскенін айтады. Содан кейін ол 30 метрлік биіктен сайға құлдырап құлаған.
Қазір Анкарадағы бас прокуратура инцидентті тексеруге кірісті.
