USD
АЛМАТЫ. 3 желтоқсан. Алматыда тағы бір 23 жастағы фельдшер қыз өз қызметін атқару кезінде жантәсілім етті. Бұл туралы Sn.kz ақпарына rast.kz хабарлайды.
Алматыда желтоқсанның 3-іне қараған түні медициналық «жедел жәрдем» көлігінің қатысуымен жол оқиғасы орын алып, ол сол машинадағы фельдшер қыздың қаза табуымен аяқталды. Оқиғадан кейін ауыр хәлде ауруханаға жеткізілген фельдшер тілге келместен қайтыс болып кетті.
Қайғылы оқиғаға байланысты Денсаулық сақтау министрі Ақмарал Әлназарова Facebook әлеуметтік желісінде жазба жариялап, онда марқұмның отбасына және жақындарына көңіл айтты.
«Жедел медициналық жәрдем фельдшері Насиба Мұхтарқызы Жаңабаеваның қызметтік міндетін атқару кезінде қаза тапқаны туралы қаралы хабарды терең күйзеліспен қабылдадым, – деп жазды министр. – Насиба небәрі 23 жаста еді, төрт ай бұрын ғана Алматы қаласының «жедел жәрдем» қызметіне жұмысқа тұрған болатын. Осы қысқа уақыт ішінде ол өз міндетіне жауапты, адал, жанашыр, әрқашан көмек көрсетуге дайын медицина қызметкері ретінде танылды. Насиба Мұхтарқызының туған-туыстарына, жақындарына, әріптестеріне және Алматының бүкіл медициналық қауымдастығына қайғырып көңіл айтамын».
Оқыс оқиға түнгі сағат шамамен 00:40-та орын алған. «Жедел жәрдем» каретасы қаланың Алатау ауданында бұрылыс жасаған кезде оған қарсы бағыттан келе жатқан Kia маркалы көлікпен келіп соққан. Соққы салдарынан екі көліктің жүргізушілері мен жолаушылары жарақат алған. Ал ауыр хәлде ауруханаға жеткізілген 23 жастағы фельдшер бірнеше сағат өткен соң алған жарақатынан көз жұмған.
Полиция бұл фактіге қатысты адам өліміне әкеп соққан жол-көлік оқиғасы бабы бойынша қылмыстық іс қозғағанын хабарлады. Қазір апаттың барлық мән-жайы анықталып жатыр.
Айта кетейік, бұған дейін Астанада тағы бір 23 жастағы фельдшер – Ұлдана Мырзуан – көп қабатты үйдің қаптамасы опырылып үстіне құлауына орай ауыр жарақат алып, тілге келместен ауруханада жантәсілім еткен еді.
