Михалков соғысқа қарсы актерлер бар фильмдерді көрсетпеуді ұсынды
МӘСКЕУ. 27 тамыз. Ресейлік режиссер Никита Михалков (жоғарғы суретте) Ресейдің соғысын қолдамайтын актерлер түскен фильмдерді көрсетпеуге шақырды. Бұл туралы The Moskou Times хабарлады.
«Ресейдің Украинаға басып кіруіне қарсылық ретінде елден кетіп қалғандарды XX ғасырдың 20-шы жылдарында мұғаджырлық жасаған мәдениет қайраткерлерімен салыстыруға болмайды», – деп соқты «Путиннің жағымпаздары» армиясының алдыңғы сапынан табылатын режиссер. Ол қазіргі әртістердің елден «алғыс айтуды» білмеушілік сипатында кетіп жатқандарын айтып, олардың қатысуымен өткен фильмдерді прокатқа жібермеу керектігін мәлімдеді.
«Өзінің соғысқа қарсы екенін білдіріп, Ресейден кетіп жатқандар – өздерін «өсірген», «танымал еткен», «сүйген» елден жиіркеніп, оған «алғыс айту» орнына «қарғыс айтып» бара жатқан адамдар, бұларға қалайда бір «баға берілуі керек», деді ол.
20-шы жылдарғы эмигранттардың бұлардан айырмашылығы, олар «отандарын тастаған жоқ, олар билікті қабылдамады, нәтижесінде сыртта фантастикалық эмигранттық мәдениет жасады» деп мәлімдеді тағы.
«Мен егер Шмелевті Ресейден шығарып жібермесе, ол «Тозақтағы жаз» туындысын немесе Бунин «Қараңғы аллеяларын» жаза алмаған болар еді деп ойлаймын», – деп атап өтті Михалков.
Бірақ Никита Михалковтың мұндай лицемерлік позициясымен режиссер Александр Сокуров (төменгі суретте) келіспеді. Ол мәдениет министрлігі де, президент әкімшілігі де мынадай тайыз ұсынысқа құлақ аса қоймайтынына үміт білдірді.
«Олар жұртқа көрсетілуге тиіс көркем туындылар, олар Ресейдің кинематография кеңістігінде өмір сүруге тиіс, олар болуға тиіс. Мен мұндай жәдігөйлікке қарсымын, оны ешбір қолдай алмаймын», – деп мәлімдеді Сокуров.
Кімнің кім екені күн өткен сайын аңғарылып келеді. Ресей екіге жарылудың сәл ғана алдында тұр.
