Назарбаевтың меншігіндегі бір банк мемлекетке қайтарылады
АСТАНА. 24 маусым. Құрылтайшысы Назарбаев қоры болып табылатын Jusan bank мемлекет қарауына алынатын болды. Бұл туралы Ulysmedia.kz хабарлады.
DALA инсайд Telegram-каналының мәліметіне қарағанда, Jusan bank-тың акцияларын мемлекетке қайтару жөніндегі келіссөздер осындай шешіммен аяқталған.
«Назарбаев қоры тарапымен өткен ауыр келіссөздер нәтижесінде Jusan bank-тің мемлекетке қайтуы бойынша жағымды шешім қабылданғанын хабарлады. Есесіне Самат Әбіш пен Қайрат Сатыбалды аса қатты қудаланбауы тиіс», – делінген DALA инсайд хабарламасында.
Айта кетейік, Jusan bank (кезіндегі Цеснабанк) мемлекеттен 1,5 триллион теңге қаржылық қолдау алған. Басында ол Әділбек Жақсыбековтің меншігіндегі банк болған. Ал мемлекеттен жоғарыдағыдай көлемде қайтарымсыз қаражат алғаннан кейін оның акциялары көп ұзамай First Heartland Securities АҚ болып шыға келген. Ал аталмыш акционерлік қоғам Назарбаев қорына, яғни Нұрсұлтан Назарбаевтың жеке өзіне бағынады.
Қор 2020-2021 жылдары банктен 113 миллиард теңгені дивиденд ретінде шығарып алған.
