«Сантехник»» Назарбаев пен оның экс-әйелі Майра істі болып жатыр
АЛМАТЫ. 21 маусым. Бұрынғы президенттің інісі Болат Назарбаев пен оның бұрынғы әйелі Майра Құрманғалиеваның үстінен ақыры қылмыстық іс қозғалды. Бұл туралы Орда.kz хабарлады.
«Алматы қаласы бойынша экономикалық тергеу департаменті Болат Назарбаев пен оның экс-әйелі Майра Құрманғалиеваға қатысты «Рейдерлік» бабы бойынша қылмыстық іс қозғады», – делінген хабарламада.
Тәуелсіздік жылдарындағы бүкіл саналы өмірін біреудің мүлкін тартып алуға арнағаны жырға айналған «Сантехниктің» ақыры жауапқа тартылғалы жатқаны жұрттың көбін қуандырып отыр.
Kozachkov offside Telegram-арнасының хабарлауынша, Нұрша Кәкенов деген азамат құзырлы органдарға «диірмені күшті» Болат-сантехниктің үстінен шағым жазып, тиісті мәлімдеме берген. Ол өз шағымында кезінде «Karuan» ЖШС құрылтайшыларының бірі болғанын, бірақ оның үлесін тартып алып қойғанын атап көрсетеді. Арызданушы шығынын көлемін 150 млн долларға бағалаған.
Ашық деректерге сүйенсек, «Karuan» ЖШС Маңғыстау облысында марганец кенін өндірумен айналысқан екен.
Еgov.kz порталының хабарлауынша, 2006 жылдың басында Нұрша Кәкенов серіктестік иелерінің бірі болған, бірақ сол жылы бірінші президенттің інісінің бір өзі ғана бұл ЖШС-нің егесі болып шыға келген.
Ал 2018 жылдың ақпан айынан бері компания екі заңды тұлғаға қарайды, оған, атап айтқанда, «Central Asian Investment Consulting Company» ЖШС мен Кипрде тіркелген ILMAX LTD егеліп етіп келеді.
2021 жылы «Karuan» ЖШС жұмысын тоқтатуға мәжбүр болған.
Қазір Болат Назарбаевтың бұдан да басқа рейдерлік әрекеттерінің іздері шығып, олар бойынша тергеу-тексеру амалдары басталып кетті.
