Қазақстан Түркиядағы бірлескен әскери жаттығуға қатысып жатыр
АНКАРА. 15 мамыр. Қазақстандық әскери қызметшілер Түркияда өтіп жатқан «Эфес-2022» әскери оқу-жаттығуына қатысуда. Бұл туралы Қазақстан Қорғаныс министрлігі баспасөз қызметіне сілтеме жасаған «Орда.kz» хабарлады..
«Түркияның Измир қаласындағы Доғанбей полигонында «Эфес-2022» көп ұлтты әскери оқу-жаттығуы өтуде. Оған Қазақстан Қарулы Күштерінің сарбаздары қатысуда. Оқу-жаттығу жауынгерлік дағдылар мен жауынгерлік машықтар деңгейін арттыруға, арнайы операциялық күштер бөлімшелерінің жауынгерлік дайындығын жетілдіруге бағытталған. Сонымен қатар, маневрлерге қатысу әскерлердің түр аралық топтастыру бөлігі ретінде өзара іс-қимылды ұйымдастыру тәжірибесін алуға мүмкіндік береді», – делінген хабарламада.
Бірінші кезең компьютерлік технологиялар мен электрондық есептеуіш жүйелерді қолдану арқылы командалық-штабтық оқу-жаттығу түрінде өтеді. Екіншісі бірлескен бөлімшелерде тікелей атыспен практикалық іс-шаралар түрінде өтеді деп жоспарлануда.
Үстіміздегі жылдың 28 мамыры мен 9 маусымы аралығында өтетін белсенді кезеңде әскери қызметшілер бірлескен құрлық және теңіз операцияларын жүргізуге, десантқа түсуге қажетті машықтарды пысықтайды.
Биылғы жылы «Эфес-2022» жаттығуына 40-қа жуық елдің әскери қызметкерлері қатысып жатыр.
