USD
АСТАНА. 16 сәуір. Сыбайлас жемқорлыққа қарсы қызмет Болат Назарбаевтың өзгенің мүлкін қарақшылық жолмен тартып алу әрекеттерін тексеруге кірісті. Бұл туралы Orda.kz хабарлады.
Порталдың хабарлауынша, қазір бұрынғы президенттің туған інісі Болат Назарбаев жұмсаған адамдардың Алматы облысындағы шыны зауытын рейдерлікпен басып алуды қалай жүзеге асырғандары зерттеліп жатыр.
Мұның дерегін Қазақстан Бас прокурорының орынбасары Әсет Шындалиев мәлімдеген.
«Прокуратура нақты әрі дұрыс тергеу жүргізу үшін бар күш-жігерін салады. Қазір сыбайлас жемқорлыққа қарсы қызмет тексеріп жатыр. Біріншіден, олар прокурор объективті бағалайтын барлық дәлелдемелерді жинауы керек», – деді ол өзінің сөзінде.
Бірақ Шындалиев тергеу құпиясына сілтеме жасай отырып, олардың қандай істер екенін ашып айтқан жоқ.
«Алматы Стекло» ЖШС жылына орта есеппен 100 миллион бөтелке мен банкі шығарады. Зауыттың бас директоры Әзім Абдуллаевтың айтуынша, ол кәсіпорынды ағаларымен бірге ашқан. Кәсіпорын Алматы облысы Қарасай ауданы «Жармұхамбет» ауылында 7 гектар жерге орналасқан. Ол жылына 5 миллион доллардан астам табыс әкеледі. Мұнда 400-ден астам адам еңбек етеді.
2006 жылы ашылғаннан кейін Абдуллаев кірісін Нұрсұлтан Назарбаевтың інісі Болат Назарбаевпен бөлісуге мәжбүр болғанын, оған 15 жыл ішінде 60 миллион доллар төлегенін айтты.
«Алматы Стекло» компаниясының қазіргі қожайыны зауыттың толық қожайыны болып қана қоймай, Болат Назарбаевқа берген ақшаның кем дегенде жартысын қайтаруға үмітті. Ол қазір құқық қорғау органдарына арыз жазып, жауабын күтіп отыр.
