Белград: Қазақстандық тағы төрт боксшы төрге озды
БЕЛГРАД. 29 қазан. Белградта өтіп жатқан әлем чемпионатында бүгін шаршы алаңға шыққан қазақстандық төрт боксшы да жеңіске жетті. Бұл туралы rast.kz хабарлады.
Рингте 1/6 финалдық ойындарының іріктеу шайқастары өтіп жатыр.
Біздің жігіттердің жеңіс тойын күндізгі сессияда шайқасқа шыққан 20 жасар дебютант Сабырхан Махмуд бастап берді. 54 килограмға дейінгі салмақтағы ол кореялық Ин Гю Кьюді емін-еркін ұтты. Бұған дейін 2017 жылы әлем чемпионатының қола жүлдесін алған, Азия чемпионатында екі рет жүлделі орындардан көрінген қарсыласы осал емес еді. Бірақ Сабырхан одан қаймыққан жоқ, салғаннан шабуылға шықты. Нәтижесінде үш раундта да басым болды, жалпы есеп – 5:0! Енді ол келесі бекетте жаңа ғана ресейлік Құрбан Байранбековті 5:0 етіп тізе бүктірген шотландиялық Метью МакХаллмен күш сынасады.
Келесі кезекте 92 кг салмақтағы Айбек Оралбайдың жолы оңғарылды. Осы салмақта Василий Левиттің орнына келген ол бұл ұрыста сенімді көрінді. Қарсыласы – поляк Матеуш Березницкиден едәуір басым ойнады. Есеп – 4:1. Бір қызығы, раунд сайын басым екені көрініп тұрған оған тек өзбекстандық рефери Александр Хамидов қана төмендетіп баға қойып отырды.
Келесі кезеңде Айбек осы жолы белорус Владислав Смягликовты 5:0 етіп ұтқан өзбекстандық қазақ жігіті Мадияр Сайдрахимовпен қолғап түйістіреді. Мадияр 1956 жылы Оңтүстік Қазақстан облысынан Ташкент облысына беріліп кеткен, қалың қазақ тұратын Шыршық ауданының тумасы екен.
Кешкі сессияда 60 кг салмақтағы Саматәлі Төлтаев таиландтық Хунатип Пинднучты 3:2 есебімен жеңді. Бірінші раундта қазақстандық 21 жасар боксшы 4:1 етіп ұтты. Екінші раунда қарсыласы сондай басымдық көрсетті. Ал соңғы раунда біздің саңлақ жеңісті тартып алды. Ұрыстың өте қиян-кескі болып өткені рас.
71 кг салмақтағы қазақстандық Асланбек Шымбергеновтің (суретте) өзбек Шахрам Гиясовпен жекпе-жегі де қызықты өтті. Бірақ ол раунд сайын қарсыласынан басым түсіп отырды. Бірінші раунд 5:0, екінші раунд 4:1 есептерімен біздің пайдамызға шешілді. Нәтижесінде 5:0 есебімен жеңіп шықты. Енді ол Германия атынан түсіп жатқан түбі дағыстандық Магомед Шахидовпен ширек финалға шығу үшін шайқасады.
Қазақстандықтар сапынан бұған дейін Бек Нұрмағамбет (86) пен Нұрлан Сапарбай (+92) ғана жарыс жолынан шығып қалды. Екеуі де қарсыластарынан талассыз жеңілді.
