Роналду «Манчестер Юнайтедке» оралған бойда екі гол соқты
МАНЧЕСТЕР. 12 қыркүйек. Белгілі португал футболшысы Криштиану Роналду «Манчестер Юнайтедке» оралысымен ойнаған бірінші матчында бірден дубль жасады. Бұл туралы Sport.ru хабарлады.
Криштиану Роналду «Манчестер Юнайтедтің» кеше кешке өз алаңында «Ньюкаслмен» өткізген ойынының басынан бастап алаңға шықты. Ол 4-2-3-1 схемасы бойынша орталық шабуылшының міндетін атқарды. Өте белсенді қимылдап, алаң аумағында еркін кезіп жүрді. Бірақ командаға оралғаннан кейінгі бірінші голын орталық форвард позициясында тұрған кезінде салды. Мұны бірінші таймға қосылған екінші қосымша минутта жасады. Әуелі Мэйсон Гринвуд айып алаңының сыртынан қақпаға қарай доп тепті. Оны «Ньюкаслдың» голкипері Фредди Вумен бір қолымен қайтарды. Алайда, доп тым ұзаған жоқ. Оны жүгіріп келе жатқан Криштиану торға қарай сүңгітіп жіберді. Ойындағы есеп осылай ашылды.
Рас, екінші таймның бас жағында (56-минут) қонақтар жарқылдаған жылдамдықпен қарсы шабуыл ұйымдастырып, таразы басын теңестіріп кетті. Голды Хавьер Манкильо өз атына жазды. Дегенмен, арада 6 минут өткенде Роналду тағы бір доп соғып, өз командасын қайтадан алға шығарды. Сөйтіп, ол «МЮ» сапында өткізген жалпы 200-ші матчында екі гол түсірді.
Бұдан кейін алаң иелері сапынан Бруну Фернандеш (80-минут) пен Джесси Лингард (90+2) мергендіктерімен көзге түсіп, қорытынды есепті 4:1-ге жеткізді.
