USD
АНТАКЬЯ. 23 желтоқсан. Қазақстан құрамасының шабуылшысы Абат Айымбетов түрік чемпионатында қатарынан үшінші ойында гол соғып, «Адана Демирспорға» жеңіс әперді. Бұл туралы rast.kz хабарлайды.
Аданалықтар бұл жолы суперлиганың 17-турының ойынын Хатай илінің (уәлаятының) орталығы – Антакья қаласында жергілікті «Хатайспор» командасымен өткізді.
Алаң иелері матч басталған бойда алға ұмтылды. Олар сол басымдықты 26-минутта Венсан Абубакардың есеп ашуына ұластырды.
Екінші таймның 53-минутында «Хатайспор» сапынан Денгиз Демир қарсыластар қақпашысын шабуыл кезінде теуіп жібергені үшін қызыл қағаз алып, алаңнан қуылды. Бұдан кейін қонақтар көп күттірмей таразы басын теңестіріп кетті. Атап айтқанда, 61-минутта шабуылшы Юсуф Барасиден доп алған қорғаушы Семих Гюлер шабуылды сәтті аяқтады. Бұдан кейін 70-минутта Арда Куртуланның жеткізген добын әдемі пайдаланған форвард Озан Демирбаг меймандарды алға шығарды. Ал 75-минутта Куртуланның бұрыштамадан берген добын голға айналдырған Абат Айымбетов жеңісті нығарлай түсті. .
Ойын соңында Абат тағы бір гол салып еді, қапталдағы төреші офсайд анықтап, оны санатпай тастады.
Сөйтіп, «Адана Демирспор» сырт алаңда 3:1 есебімен жеңіске жетті.
Командада 15 ойыннан 5 доп соққан форвард Юсуф Барасы мергендер көшін бастап келеді. Ал Абат Айымбетов 11 ойында 3 гол соғып, екінші орынға шықты.
Еске сала кетейік, қатарынан үш ойында гол соққан Абат алғаш рет 7 желтоқсан күні «Гёзтепе» командасының қақпасына соғылған жалғыз голдың авторы атанған еді. Матчта аданалықтар 1:3 есебімен жеңіліп қалды. Екінші жолы 16 желтоқсан күні «Бешикташпен» ойында біздің жерлесіміз команданың екінші голын соғып, жеңіске жеткізді. Кездесу 2:1 есебімен «Демирспордың» пайдасына шешілді.
Команда чемпионатта 8 ұпаймен әлі де ең соңғы 19-орында келеді.
