Сырдария мәселесі: мониторинг жүргізу тобы құрылды
ҚЫЗЫЛОРДА. 24 мамыр. Бұрнағы күні Қызылордада Сырдария өзеніндегі судың деңгейін бақылап тұратын мониторинг тобы құрылды. Бұл туралы облыстық ішкі саясат басқармасы баспасөз қызметінің дерегіне сүйенген rast.kz хабарлады.
Осыған арналған басқосу 22 мамырда «Достық үйі» ғимаратының мәжіліс залында өтті. Облыс әкімінің орынбасары Бақыт Жахановтың төрағалығымен өткен жиында Сырдария өзенінің су шаруашылығы жағдайы талқыланды..
Жиынға Экология, геология және табиғи ресурстар вице-министрі Серік Қожаниязов, облыстық мәслихат депутаттары, қоғам белсенділері, су шаруашылығының ардагерлері және салаға қатысты мемлекеттік мекемелердің басшылары қатысты.
Соңғы жылдары Сырдарияның төменгі ағысында вегетациялық кезең күрделі су тапшылығы жағдайында өтуде. Биыл бұл жағдай қайталанып, жағдай бұрынғыдан да күрделі болып тұр.
Қазір Сырдария өзенінің ағысын реттейтін Нарын-Сырдария су қоймаларындағы су нөпірі өткен жылғы мөлшерден 2 млрд текше метрге кем. Сонымен бірге, Шардара су қоймасына түсіп жатқан судың көлемі де өткен жылдан төмен.
Ауыл шаруашылығы министрінің бұйрығымен облысқа 5,4 млрд.текше метр, оның ішінде ауыл шаруашылығы дақылдарын тұрақты суаруға 4,2 млрд.текше метр су бөлінді. Дегенмен, судың тапшы болу болжамына байланысты Арал-Сырдария бассейндік инспекциясы биылғы су көлемін 508,9 млн текше метрге қысқартып, оны 4,9 млрд текше метр етіп қайта белгіледі. Осы ретте ауыл шаруашылығы дақылдарын тұрақты суаруға 3,7 млрд текше метр су берілмекші.
2021 жылға облыс бойынша 188,2 мың гектар жерге ауыл шаруашылығы дақылдарын орналастыру жоспарланса, оның ішінде күріш егісінің көлемі өткен жылдан 5,1 мың гектарға қысқартылып, 84,4 мың гектарға егу межеленді.
Су тапшылығының алдын алу үшін Су ресурстары комитеті мен Қызылорда облысы әкімдігінің вегетациялық кезеңде су тапшылығының алдын алу бойынша атқарылатын бірлескен іс-шаралар жоспары бекітілді. Қазір каналдар арқылы су алу режимдерінің кестеге сай орындалуына мониторинг жүргізетін жұмыс тобы құрылып, жұмысын бастап кетті.
Үстіміздегі жылдың 11 мамыры күні Мемлекетаралық су шаруашылығын үйлестіру комиссиясының 80-ші отырысы өтіп, вегетация кезеңінде Шардараға 4,1 млрд текше метр су түсуіне келісім жасалды.
Биылғы жылдың сәуір-мамыр айларында Қырғыз Республикасына су орнына электр энергиясын беру жүзеге асырылды. Енді маусым-тамыз айлары кезеңінде Тоқтоғұл су қоймасынан 330 млн текше метр көлемінде қосымша су алынады.
