Тәжікстан Қырғызстанға агрессияны жоспарлы түрде жасаған
Қырғызстан бас прокуратурасы осыған орай қылмыстық іс қозғады
БІШКЕК. 4 мамыр. Қырғыз Республикасының бас прокуратурасы Тәжікстан әскерилерінің әрекеті алдын ала жоспарластырылған агрессия екенін айғақтайтынын мәлімдеді. Бұл туралы K-News.kg хабарлады.
Бас прокуратура осыған байланысты қылмыстық іс қозғады.
«2021 жылғы 29 сәуір күні шамамен 04:40 сағатта Баткен облысы Баткен ауданындағы «Көк-Таш» айылының «Кочо-Бою» деген жерінде жергілікті тұрғындар мен тәжік азаматтары арасында орын алған қақтығысты тәжік тарапы арандату жолымен ұйымдастырған», – делінген хабарламада.
«Осының салдарынан Қырғыз Республикасы мен Тәжікстан Республикасы арасында 2004 жылғы 26 мамырда қабылданған тату көршілік және әріптестік қарым-қатынас туралы келіссөз, бейбіт қатар өмір сүру, достық және тату көршілік принциптері бұзылған, Тәжікстан Республикасының әскери қызметкерлері Қырғызстан Республикасының егемен территориясын басып алу мақсатында Қырғызстанның егемендігі мен территориялық тұтастығын бұза отырып, әлдеқандай бір кінәрат тақпастан, сол аймақтағы бейбіт тұрғындарды, мемлекеттік шекараны күзетуші әскери қызметкерлерді, бейбіт өмір тәртібін қорғаушы құқық қорғау органдарының қызметкерлерін жаппай қырып-жою жолымен біздің еліміздің аумағына тұтқиылдан басып кірді, автоматты қарулардан, минометтерден, бронды танк техникаларынан, әскери ұшақтар мен басқа да соғыс құралдарынан оқ жаудырды», – делінген хабарламада тағы.
Бұдан әрі Тәжікстан Республикасы әскери қызметкерлерінің миномет пен әскери тікұшақтарды қолдана отырып, «Булак башы», «Қапшығай», «Достук», «Мин булак» шекара заставалары мен «Кожожар», «Кызыл бел» шекара бекеттеріне, Баткен облысы Баткен және Ләйлек аудандарының елді мекендеріне қарулы шабуыл жасап, Қырғызстан Республикасының территориясын басып алғандары айтылады.
Тәжікстан әскери қызметкерлері тарапынан орын алған қарулы шабуылдың нәтижесінде Қырғыз Республикасының көптеген құқық қорғаушылары, әскери қызметкерлері және бейбіт тұрғындары түрлі отты қарулар мен жарқыншақтардан жарақат алды, олардың арасында қаза тапқандар да бар, сондай-ақ Қырғызстанның көптеген азаматтық және әскери нысандарына залал келтірілді, бірқатары жойылып кетті.
«Тәжікстан Республикасы әскери қызметкерлерінің жоғарыда аталған әрекеттері Қырғызстан Республикасының егемендігі мен тұтастығына қатысты арандату мен басқыншылықты күні бұрын жоспарлап алып жасағандарын айғақтайды», – делінген бас прокуратура хабарламасында.
Тәжікстан әскери қызметкерлерінің әрекеттерінде халықаралық келіссөздер мен келісімдерді бұзып, қарулы агрессияны, басқыншылық жасауды жоспарлау, дайындау, оларды іске қосу және оған қатысу бар екені қарастырылады.
Қырғызстан Республикасының бас прокуратурасы 2021 жылғы 29 сәуірдегі аталмыш деректе Қырғызстан Республикасы Қылмыстық кодексінің 380-бабында (бейбіт өмірге қарсы қылмыс) қарастырылған қылмыстың белгісі бар деп тапты.
Сотқа дейінгі өндірісті тергеу Қырғызстан мемлекеттік ұлттық қауіпсіздік комитетіне, ішкі істер министрлігі мен әскери прокуратураға тапсырылды.
