USD
СЕМЕЙ. 22 тамыз. Абай облысының Үржар ауданында орын алған жол апаты салдарынан үш бала қаза тауып, тағы үш бала жансақтау бөліміне түсті. Бұл туралы Semeytany.kz ақпарына сүйенген rast.kz хабарлайды.
«Абай облысының Үржар ауданында кәмелетке толмаған балалар қатысқан жол-көлік оқиғасы тіркеліп, 2–7 жас аралығындағы үш бала көз жұмды, ал 6–9 жастағы тағы үш бала түрлі жарақатпен ауруханада жатыр», – делінген мәтбұғат хабарламасында.
Облыс әкімдігінің баспасөз қызметінің мәліметінше, зардап шеккендер – екі отбасының балалары. Қайтыс болғандардың екеуі Жарма ауданы Жаңғызтөбе ауылынан ата-әжесіне қонаққа келген, біреуі – Үржар ауданында тұратын бала. Жарақат алған үш баланың екеуі – Үржар ауданынан, біреуі Жарма ауданынан екені нақтыланды.
Оқиға орнына облыс әкімінің орынбасарының үйлестіруімен арнайы жұмыс тобы жіберілді. Қаза болған балалардың отбасыларына жерлеу рәсімін ұйымдастыруға қатысты барлық қажетті қолдау көрсетіледі, сондай-ақ психологиялық және материалдық көмек беріледі.
Абай облысының әкімі Берік Уәли қара жамылған отбасыларға көңіл айтып, өңір жұртшылығы атынан қайғыға ортақтасатынын білдірді.
Президенттің тапсырмасымен Астанадан арнайы шақырылған білікті дәрігерлер жарақат алған балаларға көмек көрсетіп жатыр. Қазір олардың жағдайын Денсаулық сақтау министрлігі өзінің тұрақты бақылауында ұстап отыр.
