USD
ОТТАВА. 18 маусым. Канадада бас қосқан G7 елдері АҚШ-ты Путинге қысымды күшейтуге көндіре алмады, Трамп Украинаны қолдаудан бас тартты. Бұл туралы Dialog.ua ақпарына сүйенген rast.kz хабарлайды.
Канада байтағында өткен G7 саммиті оның мүшелері арасында елеулі келіспеушіліктердің бар екенін көрсетті: әлем лидердері АҚШ президенті Дональд Трампты Ресейге қарсы санкцияларды күшейтуге көндіре алмады.
«Үлкен жетілік» саммитінде Батыс елдері басшыларының Ресей-Украина соғысы мәселесіне қатысты алауыздығы тағы да паш етілді. АҚШ президенті Дональд Трамп Ресейге қарсы санкцияларды күшейту бастамасын қолдаудан бас тартты. «Тiптi, Ресей Федерациясының бейбiт халық арасында жаппай шығынға әкелген аяусыз шабуылдарының жаңа толқыны да оның ойынан айнымады», – деп жазды бұл жайлы Bloomberg агенттігі.
Ақпарат мәнбелерінің хабарлауынша, Трампты санкциялық қысымды күшейтуге көндіру әрекеті сәтсіз аяқталған. Ол санкциялардың «АҚШ үшін тым қымбатқа түсетінін» тағы да қайталап айтып, олардың тиімділігіне күмән келтірді. Ол бұған дейін «Кремльге қарсы жаңа шектеулер қоямын» деп қорқытқанымен, іс жүзінде атысты тоқтату туралы дипломатиялық үндеумен ғана шектелді.
Мұның есесіне, Ресей армиясы саммит өтетін күннің алдындағы түні Киевке соғыс басталғалы бері болмаған жойқын соққыларды жасады. Соның салдарынан 14 адам қаза тауып, 100-ден астамы жараланды. Тоғыз қабатты тұрғын үйге жасалған шабуыл ғимараттың тұтас бір бөлігін қиратты, қазір үйінді астынан адамдарды іздеу жұмыстары жалғасуда.
Канадаға ұшып бара жатқан Украина басшысы Володимир Зеленський бұл оқиғаны «бүкіл соғыстағы ең қорқынышты шабуылдардың бірі» деп атады.
«Бұл – таза террор. АҚШ пен Еуропаны қоса алғанда, бүкіл өркениетті әлем, сайып келгенде, лаңкестерге өркениетке лайықты түрде жауап беруі керек», –деді ол.
Алайда Оттавада Зеленський мен Трамп кездесе алмай қалды. Себебі, Таяу Шығыстағы дағдарысты желеу етіп алға тартқан АҚШ президенті саммит аяқталмай жатып, бір күн бұрын қайтып кетті. Бұл Американың Украинаға қатысты ұстанымының тұрақсыздығына мазасызданып отырған НАТО-дағы одақтастар алаңдаушылығын одан әрі күшейтіп жіберді.
Дегенмен, Құрама Штаттар мың құбылып тұрғанда, Ұлыбритания мен Еуроодақ батыл қадамдарға көшті. Олар саммиттен бір күн бұрын Ресейге қарсы жаңа, 18-ші санкциялар пакетін ұсынды. Атап айтқанда, мұнайдың баррелінің ең жоғары бағасын 60 доллардан 45 долларға дейін төмендетіп жіберіп, Ресей экономикасына күйрете соққа беру мәселесі талқыланды. Осы тұста Еурокомиссия төрағасы Урсула фон дер Лейен «қазіргі жағдайда шекті төмендету соншалықты өзекті емес» деген риториканы алға тартты. Британ премьер-министрі Кир Стармер, керісінше, «Біз бұл санкцияларды қолға алуымыз керек, мерзімі жетті», – деген байлам айтты.
Алайда Украинаның ең ірі әскери және қаржылық доноры – АҚШ әрекет ету ерік-жігерін жоғалтса, ең агрессивті санкциялар да кеш болуы мүмкін. Осыған орай Еуроодақ елдері енді Ақ үйге көпп аса сенбей, Киевті қолдаудың балама сызбаларын жасап шығуға көбірек көңіл бөліп жатыр. Брюссель, әсіресе Амермканың қолдауы әлсіреген жағдайда пікірлес елдермен өзінің қорғаныс байланыстарын нығайту қажеттігін айтып отыр.
