USD
АСТАНА. 8 ақпан. Президент Қасым-Жомарт Тоқаев Алматыдағы «Алтын Орда» базарында тәртіп орнатуды тапсырды. Бұл туралы rast.kz хабарлады.
Мемлекет басшысы бұл мәселені Үкіметтің бүгін сейсенбі күні өткен кеңейтілген отырысы барысында қозғады.
«Сауда-саттықтағы тиімсіз делдалдыққа тоқтау салатын кез келді. Мысалы, 3 миллион адам тұратын Алматы қаласы мен оның төңірегіндегі елді мекен тұрғындары тұтыну тауарларын көбіне «Алтын орда» базарынан алады», – деді ол өз сөзінде.
Тоқаев бұдан әрі: «Алматы облысы мен Алматы қаласының әкімдеріне Үкіметпен бірлесіп, базарда тәртіп орнатуды тапсырамын, – деді. – Бұл жер пайдакүнемдер үшін нағыз майшелпекке айналған. Бұған Алматыдағы қаңтар оқиғасы кезінде анық көз жеткіздік».
Мұның еліміздегі басқа өңірлерге де қатысы бар екені айтылды. «Қажет болса, бұл жұмысқа құқық қорғау органдары атсалыссын», – деді Президент
Осы жұмыстарды ретке келтіру үшін ол екі ай уақыт беретінін жеткізді. Демек, сәуірдің 8-інде бұл мәселеге қайта назар аударуға болады.
