USD
АЛМАТЫ. 25 қаңтар. Президент Қасым-Жомарт Тоқаев бүгін Алматыда өткен жиында күшті жер сілкінісін алдын ала ескертетін жүйенің неге жұмыс істемегенін сұрады. Бұл туралы Zakon.kz ақпарына сүйенген rast.kz хабарлайды.
Мемлекет басшысы сейсмикалық қауіпсіздікті қамтамасыз ету мәселелері бойынша өткен кеңесте Бас прокуратура мен антикорға жабдықтың іске қосылмай қалу себебін анықтауды тапсырды.
Президенттің айтуынша, 2021 жылы жеті министрліктің бірлескен бұйрығымен Қазақстан Республикасының 2021-2023 жылдарға арналған сейсмикалық қауіпсіздігін қамтамасыз ету жұмыстарының тиімділігін арттыру жөніндегі шаралар кешені бекітілген.
«Басқа да міндеттерді қоса алғанда, бұл құжатта Алматы қаласы үшін жойқын жер сілкіністері туралы автоматтандырылған ерте хабарлау жүйесін енгізу көзделген еді. Әдеттегідей, берілген есепте бәрі дұрыс. Осы мақсаттарға бөлінген қомақты қаражат игерілген, нысандарды қабылдап алу актісіне қол қойылған. Бас прокуратураға Сыбайлас жемқорлыққа қарсы іс-қимыл агенттігімен бірлесіп, осы мәселемен айналысуды және бір айдың ішінде қаражаттың қайда жұмсалғанын, дабыл жүйесінің неге жұмыс істемегенін анықтауды тапсырамын. Соған қарағанда, бүкіл елімізде өткізілген 27 мың сейсмикалық жаттығу мен 2,5 мың семинардың да түк пайдасы болмады». – деді Қасым-Жомарт Кемелұлы.
Мемлекет басшысы бұған дейін Алматының азаматтық қорғау жүйесі жер сілкінісіне дайын еместігін, құзырлы органдар табиғаттың сынағынан өтпегенін айтқан. Ол төтенше жағдай кезінде ненің маңызды екеніне де назар аударды.
Бұған дейін біз бұрынғы президенттің жиені Нұрәлі Әлиевтің қарауындағы компанияның өткен жазда 1,1 млрд теңгеге жер сілкінісін алдын ала анықтап тұратын жүйені сатып алғанын, бірақ Алматыдағы зілзала кезінде бұл жүйенің іске қосылмай қалғанын жазған болатынбыз.
