USD
ҚОНАЕВ. 15 қазан. Бүкіл елді дүрліктірген кісі өлімінен кейін Талғар қаласының әкімі мен оның орынбасары қызметтерінен алынды. Бұл туралы AstanaTV ақпарына сүйенген rast.kz хабарлайды.
Осыған қатысты хабарлама Талғар ауданы әкімінің сайтында жарияланған.
«Өз міндеттерін тиісінше орындамағаны үшін Талғар қаласының әкімі Күрішбеков Бақыт Қуатбекұлы, Талғар қаласы әкімінің орынбасары Матан Сағындық қызметтерінен босатылды. Қазіргі уақытта әкімдіктің басқа да қызметкерлерінің жауапкершілігі тексеріліп жатыр», – делінген құжатта.
Еске сала кетейік, 4 қазанға қараған түні Талғар қаласында болған қайғылы жағдай қоғамда үлкен резонанс тудырды. Сол түні бұзақылардың беймезгіл уақытта келіп, сұраған сырасын ала алмағандары үшін дүкенде төбелес шығарады. Оларға үш машинамен өздерінің қандыбалақ жолдастары көмекке келеді. Сөйтіп, 13 адамнан құралған топ дүкен егесін ұрыс-соға бастайды. Ал әкесіне ара түскен16 жастағы Шерзат Болатқа қарақшылар пышақ сұғып алады. Соның салдарынан жасөспірім бозбала ауруханаға жетпей үзіледі.
Кейін, 12 қазан күні түнде бұзақылар тобы марқұмның отбасы тұратын үйді өртеп жіберді.
Ақпарат мәнбелері бұлардың бәрі «Хуторлық» деп аталатын ұйымдасқан қылмыстық топтың мүшелері екенін атап көрсетіп жатыр.
Қазір осы оқиғаларға қатысты тергеу-тексеру жұмыстары жүруде. Кісі өліміне қатысы бар 13 адамның 7-і қамауға алынды.
