USD
СЕВАСТОПОЛЬ. 14 тамыз. РФ басқыншылары басып алған Қырым түбегіндегі Севастополь қаласында ресейлік сүңгуір-теңізші офицерді жарып жіберген деген күдікпен ресейлік әйел қамауға алынды. Бұл туралы «Новая газета – Европа» ақпарына сілтеме жасаған rast.kz хабарлайды.
Ресей аннексиялап алған Севастопольдегі Ленин аудандық соты Маргарита Реутт есімді 32 жастағы ресейлік азаматшаны кеше Ресей әскери қызметкерін жарылғыш заттар көмегімен жарып жібірде деген айыптаумен екі айға уақытша ұстау оқшаулағышына отырғызды.
Осыған байланысты оған РФ Қылмыстық кодексі 250-бабының 3-бөлігі «б» тармағы бойынша (соңы кісі өлтіруге алып баратын лаңкестік) айып тағылып жатыр. Тергеудің болжамы бойынша, ұсталған әйел маусымның 25-нен бері «басқа тұлғалармен бірігіп», ресейлік әскери қызметкерді жарып жіберуге дайындық жұиыстарын жүргізіп келген. Нәтижесінде ол 13 тамыз күні сол мақсатына жетіп, әскери қызметкер алған жарақаттары салдарынан қаза тапқан.
Бұған дейін ФСБ ресейлік әйелді Украина арнайы қызметінің тапсырмасы бойынша жұмыс істеді деген тұжырым шығарған. Қырымдық сөз тасушы Александр Талиповтың сөзінше, әйел жарылыстан кейін бұл жерден Сочиге дейін жетіп алып, ары қарай Ресейден ұшып кетуді жоспарластырып отырған. Алайда оны бұл мақсатына жеткіздірмей, ФСБ қызметкерлері ұстап алған. Севастопольдің Ресей тағайындаған губернаторы Михаил Развожаев айыпталушы өзінің жарылысқа қатысы барын мойындаудан бас тартты деген әңгіме таратты.
Жоғары айтылған «сексот» Талипов пен Mash ресурсының мәліметтері бойынша, жарылыс жасады деген күдік таңылып отырған Маргарита Реутт Сочи қаласының тұрғыны болып табылады. Ол өткен жылғы жазда РФ армиясын «дискредитация» жасағанына орай айыпқа тартылған, яғни «орыс әскерінің беделін түсіргені» және «полицияға бағынбағаны» үшін 30 мың рубль айыппұл төлеп, екі тәулік абақтыда отырып шыққан екен. Соттың болжамы бойынша, әйел Самара – Адлер бағытындағы пойызда келе жатқанында Ростов облысыныі Лихая станциясына дрондар шабуыл жасап кеткеннен кейін: «Сендерге сол керек, орыстар!» деп айқайлаған. Ұстау кезінде ол қарсылық көрсеткен.
Бұдан бөлек, Mash қыздың «ВКонтакте» желісінде «орысболуұят» («стыднобытьрусской») деген хэштегпен өзінің генетикалық тестін жариялағанын да атап өтті. Ол – Реутт паспортта «орыс» болып жазылғанымен, ұлтының мүлде басқа екені тегінен де анық көрініп тұр.
Ал қаза тапқан кім? Жарылыс 13 тамыз күні азанда Севастопольдегі Столет тұйығында орын алған. Блогер Анатолий Шарийдің, сондай-ақ украин БАҚ-тары мен телеграм-арналарының жазуларынша, теракт салдарынан РФ Қара теңіз флоты сүңгуір қайықтар жеке бригадасы командирінің орынбасары Роберт Шагеев деген болып шықты. Ол – Украина Қарулы күштерінің бұрынғы офицері, 2014 жылы Ресей Қырымды жалған сайлаумен басып алғаннан кейін Мәскеудің жағына шығып кеткен. Украина әскери прокуратурасы осыған байланысты оны сырттай «мемлекетке сатқындық жасады» деп айыптады.
