USD
ҚЫЗЫЛОРДА. 23 сәуір. Бүгін Қызылордада еліміздегі үшінші Президенттік кітапхананың іргетасын қалауға арналған рәсім болып өтті. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Ұлттық кітап күні қолға алынған бұл шарапатты шараға Қызылорда облысының әкімі Нұрлыбек Нәлібаев, кәсіпкер-меценат Эдуард Огай, Қазақстанның Еңбек Ері Абзал Ералиев, сондай-ақ құқық қорғау органдарының басшылары, зиялы қауым өкілдері қатысты.
Жиынды сөз сөйлеп ашқан аймақ басшысы жұртшылықты 23 сәуір – Ұлттық кітап күнімен, кітапханашылардың кәсіби мерекесімен және жаңа кітапхана құрылысының басталуымен құттықтады.
«Өздеріңізге белгілі, Мемлекет басшымыз өткен жылы аймағымызға жұмыс сапарымен келгенде Астана мен Алматы қалаларындағыдай тәулік бойы қызмет көрсететін үшінші Президенттік кітапхананың Қызылорда қаласында ашылатынын жеткізген болатын. Жерлестеріміз бұл бастаманы зор қуанышпен қабылдады, – деді облыс әкімі. – Бүгін өздеріңізбен бірге аймағымыз үшін сол маңызды жобалардың бірі – білім мен мәдениеттің алтын діңгегіне айналатын Президенттік кітапхананың капсуласын салу рәсімінде бас қосып отырмыз».
Нұрлыбек Нәлібаев өз сөзінде аталмыш жобаны жүзеге асыруға демеушілік жасайтын елімізге белгілі кәсіпкер-меценат Эдуард Огайға барша Сыр жұртшылығы атынан шынайы алғысын, зор ризашылығын білдірді.
Демеушілікпен 20 млрд теңгеге салынатын, аумағы 13 мың шаршы метрді алатын сәулетті жаңа кітапхана заманауи талаптарға сай болады. Ғимаратта оқу, конференц, басылым, архив пен сирек қорға арналған залдар, электрондық кітапхана, әлем әдебиеті бөлімі мен өнер галереялары, көрме, коворкинг орталықтары, қалпына келтіру шеберханасы қарастырылған.
«Жаңа нысан тек кітаптар жиналған жер емес, ұлтымыздың тарихын, мәдениеті мен өркениетін дәріптейтін, жерлестеріміздің рухани тынысын ашатын тәрбие мен тағылым үйі болмақ! Жаңа кітапхананың құрылысы сәтті аяқталып, ел игілігіне қызмет етіп, ұлт руханияты мен білімінің өркендеуіне үлес қосуына тілектеспін», – деді Нұрлыбек Машбекұлы.
Рәсімде кәсіпкер Эдуард Огай, жазушы-журналист Шәкизада Әбдікәрімов сөз сөйледі.
Айта кету керек, 2022 жылдан бері өңірде 22 мәдениет нысаны жаңадан салынып, ел игілігіне берілді. Барлық ауданда «Руханият орталықтары» ашылды. Облыстың бас шаһарында «Өнер орталығы», «Анаға тағзым», «Отбасы орталығы», «Оқушылар сарайы» секілді салтанатты ғимараттар бой көтерді.
Былтыр Қызылорданың астана болғанына 100 жыл толуына орай облыстық тарихи-өлкетану музейінің, Ассамблеяның 30 жылдығына орай «Қазатомөнеркәсіп» компаниясының қолдауымен «Достық үйінің» жаңа ғимараты салынды.
