USD
ҚЫЗЫЛОРДА. 16 қыркүйек. Қызылорда облысы әкімінің қолдауымен облыс полиция департаментіне жаңа дрондар табыс етілді. Бұл туралы Polisia.kz ақпарына сүйенген rast.kz хабарлайды.
Қызылорда облысы әкімі облыс полиция департаментіне ұдайы қолдау көрсетіп келеді. Соның нәтижесінде оның материалдық-техникалық базасы жаңа деңгейге көтерілуде. Департамент теңгеріміне дауыс ұлғайтқыштар мен LED жарық шамдарымен жабдықталған 4 ұшқышсыз ұшу аппараты берілді.
Жаңа дрондардың негізгі мақсаты қала аумағында қоғамдық тәртіпті қамтамасыз ету, әуеден бақылау жүргізу, дауыс ұлғайтқыш арқылы тұрғындарды тазалық сақтауға үндеу, қараңғы көшелер мен аулаларды жарықтандыру арқылы қылмыстың алдын алу, сондай-ақ жол қозғалысы кезінде әкімшілік құқық бұзушылықтарды анықтау болмақ. Сонымен қатар дрондар полиция қызметкерлерінің күнделікті жұмысын тиімді ұйымдастыруға да септігін тигізеді.
«Заманауи технологияларды қолдану – құқық қорғау қызметінің тиімділігін арттырудың басты жолдарының бірі. Жаңа дрондар қоғамдық тәртіпті сақтау, құқық бұзушылықтың алдын алу және полиция қызметін жедел ұйымдастыруда үлкен көмек болады», – деді Қызылорда облысы полиция департаменті бастығының орынбасары Ибадулла Сәбит.
