USD
ҚЫЗЫЛОРДА. 8 қыркүйек. Қызылорда облысында биыл анықталған барлық заңсыз қоқыс үйінділері жойылды. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
«Қызылорда облысында заңсыз үйінділерді анықтау және жою бойынша жүйелі жұмыстар жалғасуда», – делінген хабарламада.
Хабарланғандай, Сыр өңірінде экология департаментінің мамандары елді мекендерден тыс жерлерді қоса алғанда, аумақтарды үнемі тексеріп отырады. Анықталған оқиғалар негізінде жергілікті билік органдарымен бірлесіп аумақтарды тазарту жұмыстары жүйелі жүргізіледі. Сонымен бірге аймақта қоқыс төгетін орындардың қайта пайда болуына жол бермеудің алдын алу шаралары қабылдануда.
Облыста 2018 жылдан бері «Қазақстан Ғарыш Сапары» ҰК» АҚ-мен бірлесіп жүргізіліп келе жатқан ғарыштық мониторинг бұл жұмыста маңызды құрал болып қала береді. Биыл оның көмегімен аймақта 53 заңсыз үйінділері анықталды. Бүгінгі күнге дейін олардың барлығы толығымен жойылды.
Ғарыштық мониторинг деректері мен жер үсті тексерулерін біріктіретін кешенді тәсіл проблемалы аймақтарды уақтылы анықтауға және оларды шешу шараларын жүзеге асыруға мүмкіндік береді.
«Аумақтардың санитарлық жағдайын бақылау және жаңа заңсыз үйінділерінің пайда болуына жол бермеу жұмыстары жалғасады», – делінген хабарламада.
