USD
ҚЫЗЫЛОРДА. 15 қыркүйек. Қызылорда облысында алаяқтыққа қатысы бар күдікпен бірнеше адам қамауға алынды. Бұл туралы Polisia.kz ақпарына сүйенген rast.kz хабарлайды.
Оқиға былай болған. Жалағаш аудандық полиция бөліміне бір жергілікті тұрғын арызданған. Ол интернет арқылы «Toyota Camry 20» автокөлігіне қызығушылық танытып, көлікті сатамын деген бейтаныс азаматпен байланысып, көлікке алдын ала төлем ретінде 500 000 теңге аударған.
Артынша хабарландырудың жалған екендігін түсінген. Кешенді жедел-іздестіру шараларының нәтижесінде алаяқтықпен айналысқан екі облыс тұрғыны анықталды.
Облыстық полиция департаментінің киберқылмысқа қарсы іс-қимыл басқармасы мен Жалағаш ауданы полиция бөлімінің қызметкерлері бірлесіп, арнайы жедел-тергеу тобын құрды.
Тергеу нәтижесінде екі күдікті Астана қаласынан ұсталды. Олар уақытша ұстау оқшаулағышына қамалды. Тергеу барысында күдіктілер кінәларын толық мойындап, жәбірленушіге келтірілген материалдық шығынды толық өтеді.
Күдіктілер сот шешімімен қылмыстық жауапкершілікке тартылды.
