USD
БІШКЕК. 1 қазан. Қырғызстан президенті Садыр Жапаров балаларды зорлау, әйелдерді зорлау мен өлтіру бойынша өлім жазасын енгізуді тапсырды. Бұл туралы K-News ақпарына сүйенген rast.kz хабарлайды.
Қырғызстанда 17 жасар оқушы қыздың өлтірілуі қоғамда зор резонанс туғызды
«Кәмелетке толмаған Айсұлудың айрықша айуандықпен өлтірілуіне қатысты іс президент Садыр Жапаровтың жеке бақылауында», деп баяндады президенттің баспасөз хатшысы Асқат Алагөзов.
Мемлекет басшысы қоғамды дүр сілкіндірген бұл қылмыс туралы хабарды өте өкінішті , ауыр сезіммен қабылдады.
Осыған орай Садыр Жапаров 1 қазан күні Президент әкімшілігі құқықтық қамтамасыз ету бөлімінің меңгерушісі Мурат Укушевке балаларға, қыздарға және әйелдерге қарсы қылмыстар үшін ең қатал жазаны қарастыратын заңнамалық түзетулер әзірлеуді тапсырды. Атап айтқанда, өзгерістер балаларды зорлау, сондай-ақ әйелдерді зорлау және өлтіру қылмыстарын жасаушылар үшін өлім жазасын енгізуді қарастыруы тиіс. Президент Садыр Жапаров, әсіресе балалар мен әйелдерге қарсы қылмыс жазасыз қалмауы керек деп санайды.
Қырғызстанда өлім жазасына мораторийді алғаш рет 1998 жылы елдің тұңғыш президенті Асқар Ақаев енгізген болатын. Кейінірек ол бірнеше рет ұзартылды, сосын 2007 жылы өлім жазасы түпкілікті алынып тасталды.
Мораторий жарияланғанға дейін Қырғызстанда өлім жазасына кесілгендер атылатын болған.
Қырғызстанда орын алған қылмысты оқиға мен оған байланысты президент Садыр Жапаровтың балаларды зорлаушылар, әйелдерді зорлап, өлтіріп кетушілер үшін өлім жазасын қайта қалпына келтіру жөнінде тығыз тапсырма беруі Қазақстанда да кең талқылауға түсіп жатыр. Әлеуметтік желіні пайдаланушылардың басым бөлігі қырғыз елі лидерінің бастамасына қолдау білдіріп, мұндай қатаң да қатқыл жаза біздің республикада да жалғасын табуы керектігін алға тартуда.
