Қазақстанда мұғалімдер жалақысы екі есе өседі

Астана, 16 тамыз. Президент Қасым-Жомарт Тоқаев мұғалімдердің жалақысын екі есеге арттыруды тапсырды. Бұл туралы Tengrinews.kz хабарлады.
Мемлекет басшысы мұны мұғалімдердің тамыз конференциясында айтты.
«Үкіметке білім беру саласына білікті кадрларды тарту және педагог мәртебесін көтеру мақсатында төрт жылдың көлемінде мұғалімдердің айлық жалақыларын екі есеге көбейтуді тапсырамын. Заңның қабылдануы мен аталған шараның жүзеге асуы бұл салаға айтарлықтай өзгерістер әкеледі деп есептеймін. Үкіметтің міндеті – барлық қабылданған нормаларды іс жүзіне асыру», – деді Қасым-Жомарт Тоқаев.
Президент «Педагог мәртебесі туралы» заң жобасының бірқатар кешенді шараларды қарастыратынын айтты. Бұл мұғалімдердің жүктемесін қысқартады, ар-намысын қорғап, материалдық ынталандыру жасайды.
«Мұның ішіндегі ең маңыздысы – сынып жетекшілігі мен дәптер тексеру үшін екі есе көлемде қосымша ақы төлеу, барлық педагогтардың демалыс мерзімін 56 күнге дейін ұзарту, магистр мен басқа да нәрселер үшін қосымша ақы төлеу. Педагогтардың жүктемелерін қысқарту, оларға өздеріне тән емес қызметтерді жапсыруға, шектен тыс есеп берушілікке, негізсіз тексерулерге тыйым салу бөлек қарастырылады», – деп атап көрсетті Тоқаев.