USD
АСТАНА. 17 қазан. Қазақстан футбол федерациясының президенті Әділет Барменқұлов құраманың бас жаттықтырушысы Станислав Черчесовке қатысты қабылданған шаралар туралы айтты. Бұл туралы baq.kz ақпарына сүйенген rast.kz хабарлайды.
Барменқұловтың айтуынша, баспасөз мәслихатында қазақ тілінде сұрақ қойған тілшіні келеке еткен бас жаттықтырушыға айыппұл салынған.
«Қателіктер болады, біз бұл туралы журналистермен де сөйлестік. Черчесовтің әзілі, әрине, шектен шықты. Мен онымен бұл жөнінде жеке де сөйлестім, мемлекеттік тілдің өзектілігі мен маңызын түсіндірдім. Біз бұл мәселе бойынша Черчесовтің өзімен сөйлестік. Оған айыппұл салынды», – деді Әділет Барменқұлов.
Федерация президентінің мәліметінше, айыппұл сомасы 200 АЕК немесе 738 400 теңгені (150 мың рубль) құрайды.
Айта кетейік, бұған дейін әлеуметтік желіде футболдан Қазақстан ұлттық құрамасының бас жаттықтырушысы Станислав Черчесовтің қазақ тілін кемсітуге тырысқанын айғақтайтын видео тараған болатын. Туризм және спорт министрлігі бұл жағдайға бей-жай қарамай, Қазақстан футбол федерациясына ресми хат та жолдаған.
Ал Сенат депутаты Геннадий Шиповских ҚХА мүшесі ретінде Станислав Черчесовтің қазақ тілін француз тілімен салыстьрған әрекетіне қатысты Спорт министрі мен Қазақстан футбол федерациясына үндеу жолдады.
