USD
ӘЙТЕКЕ БИ. 12 қараша. Бүгін Қызылорда облысындағы екі ауылдың тұрғындары табиғи газдың игілігін көре бастады. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Қызылорда облысының әкімі Мұрат Ергешбаев Қазалы ауданына жұмыс сапары кезінде Жанқожа батыр және Ү.Түктібаев ауылдарына газ қосу рәсімінде болды. Осыған арналған жиынға құқық қорғау органдарының бірінші басшылары мен зиялы қауым өкілдері де қатысты.
Аймақ басшысы ауыл тұрғындарын көптен күткен игіліктің іске асуымен құттықтап, ізгі тілегін білдірді.
«Мемлекет басшымыз Қасым-Жомарт Кемелұлы: «Ауыл – біздің алтын бесігіміз. Ауылдағы тіршілік сапасын жақсартпай, жалпы ұлттық дамуды елестету мүмкін емес» деген болатын. Бүгін Жанқожа батыр және Ү.Түктібаев ауылдарын «көгілдір отынға» қосып жатырмыз. Бұл игілікті іс
Президентіміздің, Үкіметтің қолдауымен орындалып отыр. Жалпы, өңіріміздің барлық саласында осындай серпінді жобалар жүзеге асып, әлеуметтік-экономикалық даму бағытында оң тенденция қалыптасты. Тұрғындардың өмір сүру сапасын жақсарту үшін баспанамен қамту, инфрақұрылымды қайта жаңғырту қарқын алды. Мемлекет басшысының тапсырмасымен барлық елді мекенге 100 пайыз сапалы ауыз су жеткізілді.
Қызылорда қаласында «Aksa Energy» компаниясы 215 млрд теңгеге қуаттылығы 240 мегават жаңа жылу электр орталығын салып, бүгінде ел игілігіне қызмет етуде. Сондай-ақ 1,5 мың шақырымдық «Бейнеу-Шымкент» газ құбырының екінші желісі жоспарлануда. Газ құбырына 3 трлн теңге бөлінеді, оның 1,7 трлн теңгеге салынатын 846 шақырымы облыс аумағынан өтеді», – деді Мұрат Ергешбаев.
Рәсімде ел ағалары Әлімбай Қасқырбай, Берік Бисембаев сөз сөйлеп, ауданның әлеуметтік-экономикалық дамуына үлес қосқан азаматтар облыс әкімінің Алғыс хатымен марапатталды.
Өңірде 2022-2025 жылдар аралығында 65 млрд теңгеден астам қаржыға 77 жоба жүзеге асты. Былтыр 18 жобаға 17 млрд теңгеден астам қаражат бөлініп, 11 елді мекенге газ келді. Аймақта газдандыру деңгейі 83 пайыз болды.
Жыл соңына дейін тағы 10 елді мекен тұрғындары газ игілігін көріп, халықты қамту деңгейі 85 пайыздық межеге жетеді.
Бұдан бөлек, «ҚазақГазАймақ» акционерлік қоғамының инвестициялық бағдарламасы аясында 10 млрд теңгеге 6 елді мекенді газдандыру жоспарланған.
