USD
АСТАНА. 23 тамыз. Мемлекет басшысы Қасым-Жомарт Тоқаев жаңа құрылып жатқан Құрылтайдың еліміз дамуына серпін беретінін баяндады. Бұл туралы Ақорда баспасөз қызметінің дерегіне сүйенген rast.kz хабарлайды.
Президент алғашқы Құрылтай сайлауына дауыс бергеннен кейін бұқаралық ақпарат құралдары өкілдерімен брифинг өткізді. Ол журналистермен кездесу кезінде елде орын алатын бірқатар өзгерістерге қатысты бірқатар сауалдарға жауап берді.
Брифингте микрофонға бірінші болып келген «Хабар» телеарнасының тілшісі Сағыныш Әбікей Мемлекет басшысына: «Сіз конституциялық реформа тарихи өзгерістердің бастамасы екенін, ал түбегейлі жаңғырту жыл соңына дейін, тіпті, келесі жылы да жалғасатынын айтқан едіңіз. Құрылтай мен Қазақстан Халық Кеңесі іске кірісіп, Вице-президент лауазымы тағайындалғаннан кейін елде қандай өзгерістер болады?» деген сауал тастады.
«Жұрттың бәрі Вице-президент лауазымы туралы сұрап жатыр. Расында, бұл – айтулы өзгеріс, – деді сонда Қасым-Жомарт Кемелұлы. – Біз Конституциямызға жаңа лауазымды арнайы енгіздік. Себебі қазіргі бұлыңғыр заманда мұндай лауазым елімізге өте қажет».
Президент бұл лауазым иесінің келесі аптада немесе он күн ішінде мәлім болатынын баяндады.
«Мен оны қазір анық айта алмаймын. Ол белгілі, сіздер жақсы білетін адам болады деп ойлаймын», – деді Қасым-Жомарт Тоқаев.
Айтуынша, елде тағы бірқатар реформалар қолға алынады. Мысалы, Қазақстан Халық Кеңесінің жұмысын жандандыру қажет. Халық Кеңесі дегеніміз – жаңа орган. Кейбір азаматтар Ассамблея туралы сұрап жатыр екен. Халық Кеңесі Ассамблеяның атқарған қызметін одан әрі күшейтеді деп ойлаймын. Бұл көп функционалды, жаңа саяси тетік деп айтуға болады.
«Сондықтан Кеңестің жұмысы жемісті болатынына кәміл сенемін. Жалпы, жоспарымыз өте ауқымды. Осыған дейін айтқанымдай, Қазақстан үлкен құрылыс алаңына айналуы керек. Әр облыс орталығында немесе аудандар мен қалаларда ірі құрылыстар жүргізіледі. Емханалар, балаларға арналған оңалту орталықтары, басқа да нысандар салынады. Астанада жаңа көпір, Домбыра сарайы, Су ресурстарын зерттеу орталығы секілді маңызды нысандар бой көтереді. Қалаларды абаттандыру керек. «Таза Қазақстан» акциясын ойдағыдай жалғастыру қажет. Сондықтан қол қусырып отыруға болмайды. Бәріміз бір ел болып іске кіріскеніміз жөн. Біздің Қазақстаннан басқа Отанымыз жоқ, Отан үшін бәріміз күш салуымыз керек. Жалпы, саяси науқан жақсы өтті. Себебі жұрт алдына жаңа тұлғалар шықты, ұтымды идеялар айтылды», – деді Президент бұдан әрі.
«Бұл Құрылтай еліміздің дамуына тың серпін береді деп ойлаймын», – деп осы ойды тиянақтады Мемлекет басшысы.
