USD
АТЫРАУ. 15 наурыз. Мемлекет басшысы Қасым-Жомарт Тоқаев Атырауда өз атынан берілген ауызашарда дін мәселесінің ұлттық қауіпсіздікке қатысты екенін айтты. Бұл туралы Ақорда баспасөз қызметі ақпарына сүйенген rast.kz хабарлайды.
Президент ауызашарда сөйлеген сөзінде иман жолына бет бұрған жастарға дұрыс бағыт сілтеу өте маңызды міндет болып табылатынын атап өтті.
Мемлекет басшысы алдымен жиналған қауымды қасиетті Рамазан айымен құттықтап, Ұлттық құрылтай жұмысына белсенді атсалысқандары үшін алғыс сезімін білдірді. Ол сонымен қатар Оразаға тұспа-тұс келген биылғы жиынның мән-маңызы ерекше екеніне салмақ салды.
«Барша мұсылман қауымы Рамазан айын асыға күтеді, осы қасиетті айда ең асыл тілектерін тілеп, дұғаларын жасайды. Жұртшылық иманын күшейтіп, рухани тазарады. Азаматтарымыз мұқтаж жандарға көмектеседі, басқа да игі амалдар жасайды. Мұндай қадамдар, түптеп келгенде, әр адамға, әр шаңыраққа береке әкеледі. Сол арқылы еліміздің ынтымағы арта түседі», – деді Қасым-Жомарт Кемелұлы.
Президент Ислам дінін төл мәдениетіміздің ажырамас бөлігі екенін алға тартып, ата дініміздің адамзатты мейірімді, адал, білімпаз және еңбекқор болуға үндейтінін жеткізді.
«Осы асыл қасиеттер халқымыздың салт-дәстүрінен де айқын көрінеді. Өздеріңізге мәлім, мен ұлттың жаңа сапасын қалыптастыру туралы үнемі айтып жүрмін. Құрылтай кезінде де айттым, еліміздің әрбір тұрғыны нағыз «Адал азамат» болуы керек. Біз жас ұрпақтың бойына ұдайы жақсы қасиеттерді сіңіре беруіміз қажет», – деді Қасым-Жомарт Тоқаев.
Мемлекет басшысының айтуынша, озық ел болу үшін азаматтарымыздың мінез-құлқы, іс-әрекеті, ойы, ниеті – бәрі де соған сай болуы керек. Бұл орайда жастарға адал еңбекпен табысқа жету қажеттігін түсіндіру, ел ағаларының өмірлік тәжірибесін үйрету өте маңызды.
Бұған қоса, Президент бүгінгі Ұлттық құрылтай жиынында дін мен дәстүрдің бірлігіне арнайы тоқталғанын атап өтіп, ұлттық болмысымыздың арқауы саналатын осы екі құндылықты бір-біріне қарсы қойып жүрген теріс ағымдар жөнінде алаңдаушылығын білдірді.
«Ашығын айтсақ, дін мәселесі бұл – ұлттық қауіпсіздік мәселесі. Біз сырттан келген жат ағымдардың ұрпақ санасын улауына жол бермеуіміз керек. Бұған салт-дәстүрімізді сақтау және саналы ұрпақ тәрбиелеу арқылы төтеп бере аламыз. Осы орайда Қазақстан мұсылмандары діни басқармасы айрықша рөл атқаруға тиіс. Иман жолына бет бұрған жастарға дұрыс бағыт сілтеу – өте маңызды міндет. Мүфтият осы іске баса мән беріп, мұқият айналысқаны жөн», – деді Қасым-Жомарт Тоқаев.
Сонымен қатар Мемлекет басшысы еліміздің жаңашылдық пен жасампаздық жолына түскеніне назар аударды. Бұл – Наурыз мерекесімен және Ислам құндылықтарымен толық үндесетін сара жол.
«Биылдан бастап елімізде әз-Наурыздың онкүндігін жарияладық, яғни әр күнді ерекше атап өтетін болдық. Бүгін 15 наурыз – «Қайырымдылыққа» арналған. Ұлыстың ұлы күні қарсаңында елімізде көптеген игі істер жасалуда. Халқымыз жанашырлық, тілеулестік, бауырмалдық сияқты асыл қасиеттерін іс жүзінде көрсетіп жатыр. Бұл, шын мәнінде, озық қоғамға тән сипат деуге болады», – деді Мемлекет басшысы.
Сонымен қатар ауызашарда Қазақстанның Еңбек Ері, композитор Илья Жақанұлы, «Вайнах» Қазақстан шешендері мен ұңғыштары қауымдастығының тең төрағасы Ахмет Мурадов, Астана мемлекеттік қызмет хабы басқарушы комитетінің төрағасы Әлихан Байменов сөз сөйледі.
