USD
КРАСНОЯРСК. 22 ақпан. Ресейдің Красноярск өлкесінің тұрғыны Виталий Путин Украина жерінде жүріп жатқан «арнайы соғыс операциясы» ұрыстарында опат болды. Бұл туралы «Тайга.Инфо» хабарлады.
«Красноярск өлкесі тұрғындары арасында «арнайы операцияда» қаза табушылар саны күрт өсіп келеді. Сондайлардың бір тобын жерлеу өлкенің Рыбинск ауданында болып өтті», – деп жазады сайт.
Иркутск облысындағы Тулун қаласының тұрғыны Виталий Путин «арнайы операция» барысында украин отан қорғаушыларының оғынан әзірейілге жан берген. Красноярскіге қарасты Рыбинск ауданының муниципалды «Голос времени» газетінің хабарлауынша, ауданда жерленгендер арасында оның да мәйіті болған.
Путин түлен түртіп, тамұққа тартып кеткенге дейін Ресей темір жолында жұмыс істепті. 2012 жылы Красноярск өлкесіндегі Саян кентіне көшіп келіп, отбасын құрады. Соғыс басталғаннан кейін мобилизацияға ілікпепті. Бірақ фамилиясының құрметін көтермекші болып, майданға өз еркімен аттанған. Өкінішіне қарай, онда көп уақыт соғысып жарытпапты, 7 желтоқсан күні, сірә, кезекті қасапты қырғынның қапылысында қиғашынан қиылып түскен. Дегенмен, сүйегін еліне жеткізудің реті мен кезегі енді келіпті.
Бұдан бұрынырақта өлкенің Большемурт ауданындағы Айтат селосының тумасы, 26 жастағы офицер Юрий Шнайдер «арнайы операцияның» құрбандығына ұшыраған. Ол РФ президенті Владимир Путин биылғы жаңа жылдық үндеуін оқығанда оның оң жақ иығы тұсында тұрыпты. Соның артынша майданға сапар шеккен… Сапары сәтті бола қоймапты…
