USD
АСТАНА. 25 сәуір. Президент Қасым-Жомарт Тоқаев мемлекет бүлінген баспаналарды жөндеп, қирап қалған үйлердің орнына жаңасын салатынын мәлімдеді. Бұл туралы inbusiness.kz ақпарына сүйенген rast.kz хабарлайды.
Мемлекет басшысы мұны Қазақстан халқы ассамблеясының «Бірлік. Жасампаздық. Өрлеу» атты ХХХІІІ сессиясында айтты.
«Табиғат апатын еңсеретін күн алыс емес. Топан су кеткен соң одан зардап шеккен аймақтар қалпына келтіріледі. Ең алдымен, азаматтарға шығындарын өтеу үшін тиісті өтемақы төленеді. Үй-жай құрылысы басталады, баспана беріледі, бүлінген инфрақұрылым жөнделеді. Осы қыруар жұмыс өте аз уақытта, яғни жаз бен күздің 5-ақ айында аяқталуға тиіс. Бірақ біз бірлесіп, бұл шаруаны абыройымен атқарып шығамыз деп сенемін.
Алапат тасқынның кесірінен мыңдаған адам мал-мүлкінен айырылып, табыссыз қалды. Сондықтан мемлекет азаматтарды қолдау үшін нақты шаралар қабылдап жатыр. Зардап шеккен әр шаңыраққа бір реттік көмек беріледі. Бұдан бөлек, шығынды санағаннан кейін жойылған немесе зақымдалған мүлік үшін де өтемақы беріледі. Мемлекет бүлінген баспаналарды жөндейді, қирап қалған үйлердің орнына жаңасын салады.
Сонымен бірге өзен жағасына үй салу қауіпті, оны қайтадан су шайып кетуі мүмкін екенін ескерген жөн. Сондықтан құрылыс салатын жерді таңдағанда елді мекеннің гидрологиялық және географиялық ерекшелігін қаперде ұстаған абзал. Әкімдіктер тиісті ереже талаптарын қатаң сақтауға тиіс. Алдағы ауқымды құрылыс жұмыстары жұртқа жаңа мүмкіндіктер береді деп ойлаймын», – деді Қасым-Жомарт Тоқаев.
Осымен бір мезгілде Ресей билігінің су тасқынынан зардап шеккен отандастарына 10 мың рубльден (теңгеге шаққанда – 48,4 мың), ал Қазақстанда 260 мың теңгеден өтемақы бергелі жатқаны белгілі болды.
Кремль бұған қоса, бүлінген және қираған үйлер мен қора-қопсылар үшін ештеңе төленбейтінін ашып айтып отыр.
