USD
ЖАҢАҚОРҒАН. 4 тамыз. Полицейлер Қызылорда облысы Жаңақорған ауданындағы «Тау самалы» жазғы сауықтыру лагерінде оқушылармен тәртіп бұзушылықтың алдын алуға бағытталған шараға кезек берді. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Хабарламада атап көрсетілгендей, «Заң мен тәртіп» қағидаты аясында Жаңақорған аудандық полиция бөлімінің ювеналды полиция тобының инспекторлары жазғы сауықтыру лагерінде демалып жатқан оқушылармен профилактикалық кездесу өткізген.
Іс-шараның басты мақсаты жасөспірімдердің құқықтық сауаттылығын арттыру, қауіпсіздік ережелерін сақтау мәдениетін қалыптастыру және құқық бұзушылықтың алдын алуға арналды.
Кездесу барысында балаларға жол қозғалысы ережелерін сақтау, жаяу жүргіншілердің қауіпсіздігі, жолдан дұрыс өту тәртібі, сондай-ақ велосипед, мопед және электр самокатын пайдалану кезіндегі қауіпсіздік талаптары кеңінен түсіндірілді.
Сонымен қатар қоғамдық орындардағы тәртіп ережелері, буллинг пен кибербуллингтің, вандализмнің, ұсақ бұзақылықтың және өзге де құқық бұзушылықтардың алдын алу, олардың заң алдындағы жауапкершілігі туралы жан-жақты ақпарат берілді.
Шара соңында полиция қызметкерлері оқушыларды заң талаптарын құрметтеуге, қоғамдық тәртіпті сақтауға және өз өмірі мен айналасындағылардың қауіпсіздігіне жауапкершілікпен қарауға шақырды. Кездесу барысында оқушылар құқықтық қауіпсіздікке қатысты өздерін толғандырған сұрақтарға жауаптар алды.
