USD
БЕРЛИН. 24 ақпан. Германиядағы сайлауда жеңіске жеткен Фридрих Мерц Украина мен АҚШ-қа қатысты өз ойын білдірді. Бұл туралы ВВС ақпарына жүгінген rast.kz хабарлайды.
Германиядағы сайлауда ХДС/ХСС блогы 299 округтен 28,6% дауыс жинап, жеңіске жетті.
Екінші орынды Илон Маск дауыс беруге шақырған ресейшіл «Германия үшін балама» партиясы алды. Ол марофонда 20,8% дауыс жинады.
Үшінші орынға 16,4% дауыс жинаған Шольцтің партиясы СПД орналасты.
Үздік бестікке сондай-ақ 11,6% дауыс жинаған Жасылдар партиясы және 8,8% дауыспен Солшылдар партиясы кірді. Сонымен бірге тағы бір ресейшіл Сара Вагенкнехттің партиясы Бундестагқа кіре алмайды, өйткені ол 5 пайыздық дауыс кедергісін еңсерген жоқ.
Сарапшылар ең ықтимал коалиция ХДС/ХСС пен СДП арасындағы альянс болады деп есептейді. Канцлер лауазымына басты үміткер – Фридрих Мерц. Олаф Шольц Мерцтің жеңісін, сондай-ақ өз партиясының сайлауда бірінші орын алмауына әкелген қателіктерін мойындады.
Сайлаудан кейін Мерц неміс баспасөзіне берген сұхбатында АҚШ-тың сайлауға араласуының тура Ресейдікі сияқты «өте өрескел», яғни «арсыз әрекет» болғанын айтты. Ол Берлиннің АҚШ-тан «тәуелсіздік» саясатын ұстанатынын, ал Уашингтонның өзі, әсіресе Трамптың тұсында Украинаның болашағына ешқандай қызығушылық танытпайтынын атап өтті. Сондықтан Германия Украинаны жан-жақты қолдау саясатын ұстанады.
АҚШ президенті Дональд Трамп әлеуметтік желіде Германиядағы сайлаудың Америка үшін де «үлкен жеңіс» болғанын жазды. Оның айтуынша, неміс халқы да америкалықтар сияқты мигранттардан әбден шаршаған. Осыған қарағанда, кейбір ресурстардың жазып жатқанындай, Трамп Германия билігіне кімдердің келіп жатқанын да дұрыс пайымдай алмаған сияқты. Ол дойч елі жаңа басшылығының Ақ үйге оншалықты жылы қабақпен қарай қоймайтынын, мұнысын әлден айтып та үлгергенін аңғармапты.
Мерц болса, өз кезегінде Трамптың сыртқы саясаты Украинаның, демек, Еуропаның да «төбелерінен аттап өтіп», АҚШ пен Ресейдің арасын бір-бірлеріне жақындату болатынын атап өтті. Сондықтан да қазір еуропалықтардың назары Германияға ауып тұр.
Украина президенті Володимир Зеленьский Мерц пен оның партиясын сайлаудағы жеңісімен құттықтады. Ол Киев пен Берлиннің Украина үшін де, Еуропа үшін де маңызды мақсаттарға жету жолында бұдан да тығыз ынтымақтаса жұмыс істейтіндеріне сенім білдірді.
