USD
БРЮССЕЛЬ. 6 қыркүйек. Еуропа Украинадағы бейбітшілікті АҚШ-сыз, өз беттерінше қамтамасыз етіп бере алмайтынын ашып айтты. Бұл туралы Bloomberg ақпарына сүйенген rast.kz хабарлайды.
Украинаға қауіпсіздік кепілдігін бергісі келетін Еуропа елдері Уашингтонның қолдауынсыз мұны істей алмайды.
Еуропа елдерінің лидерлері өздерінің қорғаныс мүмкіндіктері әлі де шектеулі екенін алға тартып, тек АҚШ-тың ғана Украинаға нақты қауіпсіздік кепілдігін беретінін мәлімдеді.
Ресеймен бітімгершілік жасасу екіталай нәрсе және Украинаны ұзақ мерзімді қорғау қажеттілігі барған сайын айқын бола түсуде.
Халықаралық стратегиялық зерттеулер институтының мәліметінше, Еуропада спутниктік барлау, біріктірілген әуе қорғанысы және зымыранға қарсы қорғаныс жүйелері тапшы. Бұл аймақты толығымен дерлік Құрама Штаттар ғана қамтамасыз ете алады.
Американың әскери мүмкіндіктерін алмастыру еуропалықтарға шамамен триллион долларға, ал барлау ресурстарын толықтыру 5 миллиардқа жуық долларға түседі. НАТО Ресейдің Украинаға басып кіруіне тойтарыс беруде басты рөлді америкалық спутниктер мен технологиялар атқарғанын атап өтті. Чехия Сыртқы істер министрлігі қауіпсіздік департаментінің басшысы Вероника Штромсикова: «Бұл келісімнің бір бөлігі болуы керек, бұлай болмасы көзсіз соқырға айналасыз» дегенді баса айтты. Оның сөздері еуропалықтардың ортақ алаңдаушылығын көрсетеді: АҚШ болмаса, Украина мен оның одақтастары ресейлік қатерге дер кезінде жауап қайтара алмайды.
Еуропаның ұзақ қашықтықтағы зымыранға қарсы қорғаныс жүйесі де жеткіліксіз. Әзірге негізгі қорғанысты америкалық патриоттар қамтамасыз етеді, олардың бір бөлігі, сондай-ақ француз-итальян SAMP/T жүйелері Украинаға берілді,
НАТО-ның бас хатшысы Марк Рютте Прагада өткен саммитте одақтастардың әуе шабуылына қарсы қорғаныс жүйелерін кем дегенде бес есеге көбейту қажеттігін айтты. Швеция қорғаныс министрі Пал Йонссон континент өзінің экономикалық мүмкіндіктерін тез арада нақты әскери күшке айналдыруы керек дегенді баяндады.
Сонымен бірге, коалицияға кіретін 35 мемлекеттің 26-сы Украинаның қауіпсіздік кепілдігіне, – мейлі ол техника, әскер немесе оқу-жаттығу болсын, – өз үлестерін қосуға дайын екенін растады. Франция президенті Эммануэль Макрон АҚШ-тың қандай қолдау көрсететіні алдағы күндері белгілі болатынын жеткізді. Еуропа көшбасшыларымен сұхбатында Дональд Трамп Ресейге ғана емес, Қытайға да санкциялық қысымды күшейтуді тағы талап етті.
