USD
ЛЮБЛЯНА. 21 қараша. Бүгін түнде Еуро-2024 чемпионаты іріктеу турнирінің ең соңғы матчында Қазақстан құрамасы сырт алаңда Словениямен ойнап, 1:2 есебімен ұтылып қалды. Бұл туралы rast.kz хабарлайды.
Айта кетуіміз керек, қазақстандық футболшылар турнирдің Н тобындағы бірінші кездесуін өз алаңында словендермен өткізіп, 1:2 болып жеңілген еді.
Словения байтағы – Люблянада ойналған матч Астана уақытымен 01:45 сағатта басталды. Дәл осы сәтке дейін словениялықтар 19 ұпаймен екінші орында тұрса, біздің құрама 18 балмен үшінші сатыға орналасқан еді. Ал 22 ұпайы бар Дания мұның алдындағы турда словендерді өз алаңында 2:1 етіп сүріндіріп, келер жылы жазда Германияда өтетін құрлық чемпионатының финалдық бөліне жолдама алып қойған болатын.
Бұл кездесудің Қазақстан құрамасы тарихындағы ең маңызды матч болғаны анық. Себебі, бұған дейін біздің команда әлемдегі ең ірі халықаралық турнирлердің бірде-бірінің финалдық бөлігіне өтуге дәл осыншалықты жақын келмеген-ді.
Ойынның бірінші таймы допты уыстарынан көп шығара қоймаған алаң иелерінің айқын басымдылығымен өтті. Дегенмен, соның арасында қазақстандықтардың бірнеше рет қарымта шабуыл жасауларының да орайлары келді. Сол сәттердің бірінде Исламбек Қуаттың берген керемет добын Ислам Чесноков пайдалана алмай қалды. Мұның есесіне, Ян Вороговский өз айып алаңында қарсыластар шабуылын қайтармақ болып жатқанында тәртіп бұзып, ойламаған жерден өз қақпасына қарай пенальти соғылуына жол ашып берді. Оны Беньямин Шешко құр жібермеді – 1:0! Есеп осылай ашылды.
Бір тәуір жері, бұған еңселері түсе қоймаған біздің жігіттер екінші таймның басында есепті теңестіріп үлгерді. Шабуылшы Максим Самородовтың берген добын керемет пайдалана білген жартылай қорғаушы Рамазан Оразов алаң иелері қақпашысының қапыда қалдырды – 1:1.
Магомед Адиевтің шәкірттері таразы басын теңестіргеннен кейін мейлінше батыл ойнап, шабуылға жиі шыға бастады. Алай да бірнеше мүмкіндік босқа кетті. Мұның орнына, алаң иелері 86-минутта жасаған қарсы жорықтарының бірінде матч тағдырын біржола шешіп кетті. Бұл жолы Беньямин Вербич қатты соққымен допты «тоғыздыққа» түсіріп, өз командасын алға шығарып жіберді.
Айта кету керек, Қазақстан құрамасының Еуропа чемпионатының финалдық бөлігіне шыға алатын тағы бір мүмкіндігі бар. Бірақ міндетті орындау қиындау. Бұл үшін ол Ұлттар лигасының шеңберінде наурыз айында Грекияда жергілікті құрамамен ойналатын ойында жеңіске жетуі керек.
