USD
БІШКЕК. 17 сәуір. Қырғызстан астанасы Бішкекте өтіп жатқан Азия біріншілігінде грек-рим күресінен қазақстандық Ержет Жарылқасын чемпиондық тұғырға көтерілді. Бұл туралы Aikyn.kz ақпарына сүйенген rast.kz хабарлайды.
Ұлттық олимпиялық комитеттің баспасөз қызметі мәлім еткендей, 63 келіге дейінгі салмақта ел намысын қорғаған Ержет Жарылқасын финалда жапондық Аята Сузукимен белдескен.
Өте тартысты жекпе-жек 6:6 есебімен аяқталады. Алайда әдіс сапасы жөнінен Ержеттің ұпайы қомақты болып есептеледі. Сөйтіп, жеңіс біздің оғланға беріледі. Ол осылайша ересектер арасындағы чемпионатта өзінің бірінші медалін жеңіп алды.
Ержет Жарылқасын – 63 келіге дейінгі салмақта Қазақстанның ересектер арасындағы және 23 жасқа дейінгі жастар арасындағы чемпионы.
Ол Бішкекте өтіп жатқан Азия чемпионатының финалына дейін Корея, Сауд Арабиясы және КХДР палуандарын жеңді.
