USD
ТАРАЗ. 6 маусым. Денсаулық сақтау министрі Ақмарал Әлназарова Жамбыл облысындағы жұмыс сапары барысында аналар өліміне жауапты басшылар алдына тиісті талаптар қойды. Бұл туралы Jambylinfo.kz ақпарына сүйенген rast.kz хабарлайды.
Денсаулық сақтау министрі облыс медицина қауымдастығымен өткен кеңесте өңірдегі акушерлік-гинекологиялық көмекті ұйымдастырудағы кемшіліктерді қатаң сынға алып, әйелдер мен балаларға көрсетілетін медициналық көмектің сапасын арттыру бойынша шұғыл шаралар қабылдауды тапсырды. Ол жүргізіліп жатқан жұмыстар мен уәкілетті органдардың бақылауына қарамастан, өңірде ана өлімі жағдайларының әлі де тіркеліп отырғанын атап өтті. Мұның өзі саланың барлық деңгейіндегі қызметтің нәтижелілігіне түбегейлі баға беруді қажет етеді.
«Биылғы жылдың төрт айында облыста ана өлімінің үш жағдайы тіркелді. Босандыру қызметін көрсететін барлық ұйымдар тексерулермен қамтылғанына қарамастан, халықтан медициналық көмектің сапасына қатысты келіп түсетін өтініштер мен шағымдар саны әлі де жоғары деңгейде қалып отыр», – деді Ақмарал Әлназарова.
«Ана өлімінің әрбір жағдайы жан-жақты талдауды және жүйелі шешімдер қабылдауды талап етеді. Жүкті әйелдерді бағыттау, кадрлық қамтамасыз ету және бақылау мәселелеріне формальды түрде қарамай, пациенттерді барлық кезеңдерде толыққанды сүйемелдеу жүйесін қалыптастыру қажет», – деді бұдан әрі министр.
Министр жиында медициналық-санитариялық алғашқы көмек деңгейінде ведомствоаралық өзара іс-қимылды күшейтуді, жүктілік асқынуларын уақтылы анықтауды қамтамасыз етуді, патронаждық бақылаудың сапасын арттыруды және медициналық ұйымдар басшыларының жұмыстың түпкілікті нәтижелері үшін жеке жауапкершілігін күшейтуді жүктеді.
