USD
ЛИВЕРПУЛЬ. 16 қыркүйек. Бұрнағы күні Ливерпульде аяқталған бокстан әлем чемпионатында қазақ атлеттерінің жолын қасақана кесуші арбитрдың есімі анықталды. Бұл туралы Skifnews.kz ақпарына сүйенген rast.kz хабарлайды.
Ол Түркиядан келген Давут Кануни деген төреші болып шықты.
Біздің боксшыларға тек қараулық ниет ұстанған азамат финалдық жекпе-жектер өткен күні ең алдымен 48 келіге дейінгі салмақтағы Назым Қызайбайға қатты зиянын тигізді. Ол үш раундта да біздің саңлақтың қарсыласы – үндістандыққа 10:9 есебімен ұтыс берумен отырды. Соның салдарынан Назым алтын медальдан қағылды. Егер түрік шын әділдігіне салып, тым болмаса бір раундта жеңіс бергенінде Қызайбай чемпион болғалы тұр еді.
Түрік арбитрі бұдан кейін аса ауыр салмақтағы Айбек Оралбайға да соңына дейін кері ұпай берумен болды. Бірақ соңғы шешуші раундта басқа төрешілердің ұтыс берулері арқылы 4:1 деген есепке қол жеткізген Айбек ақтық жеңіске жете алды.
Қазақ боксшыларының қаскөйі кім екенін белгілі спорт журналисі Аслан Қаженов тез анықтап берді. Ол Назымның аяғына тұсау салған төрешінің түсін-түстеп, кім екенін бірінші боп жариялады.
«Назым Қызайбайды ұтып тұрған жерінен барлық раундта тоғыз баллдан қойып, алтын жүлдесінен айырған түрік төреші осы. Аты-жөні – Davut Kanuni. Артынша Айбек Оралбайға да барлық раундқа тоғыз балл қойды. Инста аккаунты жоқ екен. Десе де осылай суретін салып қояйын. Білсін, қазақ елі бұндай қастандықты ұмытпайтынын. Түбі кездесеміз! Бетіне басамыз!», – деп жазды ол.
