USD
ЛОНДОН. 12 тамыз. Қазақ футболының жас жұлдызы Дастан Сәтбаев бүгін 18 жасқа толды, осы күні ол Лондонның «Челси» клубымен контракт жасасады. Бұл туралы rast.kz хабарлайды.
Бүгін Дастанның өміріндегі басты оқиғалардың бірі тіркеледі, ол ағылшын Премьер-лигасының клубы – «Челсимен» тиісті келісімшартқа отырады. Бұған дейін жас футболшы кәмелетке толмағанына байланысты ФИФА-ның ережесі бойынша команданың заңды ойыншысы бола алмай келген болатын.
Қазір Дастанның ағылшын клубындағы келешегі жайлы көп айтылып жазылып жүр. Соның бірінші варианты – ол «Челсидің» бірінші құрамында қалады, бас жаттықтырушы Хаби Алонсоның өзі бұған ерік берген сияқты. Екінші варианты – «Челсидің» Франциядағы фарм-клубы болып саналатын «Страсбурға» бір жылға жалға беріледі. Ол француз чемпионатының бірінші (жоғары) лигасында ойнайды. Үшінші варианты – ағылшын чемпионатының бірінші лигасында ойнайтын «Халл Ситиге» бір жылдық мерзімге жалға жіберіледі. Мұны осы команданың басшылары өздерін ұсынып отырғанға ұқсайды.
Не дегенде де, бұл мәселенің түйіні бүгін-ертең шешіліп қалатын сияқты.
Англия Премьер-лигасының 2026/2027 жылғы маусымдағы чемпионаты 21 тамыз күні басталады. Ол «Арсенал» және «Ковентри Сити» командаларының ойынымен ашылады. «Челси» өзінің бірінші матчын 24 тамыз күні өткізіп, Лондонның «Фулхэм» командасын өз алаңында қабылдайды.
