USD
ЖАҢАҚОРҒАН. 6 тамыз. Қызылорда облысының әкімі Мұрат Ергешбаев Жаңақорған ауданына жасаған жұмыс сапары кезінде «Бекарыс-Агрофуд» ЖШС асыл тұқымды мал шаруашылығының жұмысымен жете танысты. Бұл туралы Қызылорда облысы әкімі баспасөз қызметінің дерегіне сүйенген rast.kz хабарлайды.
Серіктестік негізінен асыл тұқымды мал өсірумен және суармалы егін шаруашылығымен шұғылданады. Қазіргі уақытта мұнда 10 адам тұрақты жұмыспен қамтылған. Шаруашылық қарамағында 1 000 басқа арналған бордақылау алаңы және тәулігіне 10 бас мал соятын пункт бар.
Бүгінде ұжымда 864 бас ірі қара, 300 бас жылқы, 4 077 бас қой, 211 бас түйе және 668 бас асыл тұқымды ірі қара өсірілуде.
Сонымен қатар, 1 500 гектар жайылымдық және 300 гектар суармалы жерге иелік етеді. Биыл шаруалар 67 гектарға күріш, 50 гектарға күздік бидай және 50 гектарға жоңышқа екті.
Аймақ басшысы шаруашылықтың өндірістік әлеуетімен танысып, жауапты сала басшыларына нақты тапсырмалар жүктеді.
Жаңақорған – ауыл шаруашылығы қарқынды дамып келе жатқан аудандардың бірі. Биыл диқандар 36 077 гектар жерге егін ексе, оның 6 756 гектары – күріш дақылы.
Жыл басынан бері салада өндірілген жалпы өнім көлемі 7 млрд 427 млн теңгеге жетіп, өткен жылдың сәйкес кезеңімен салыстырғанда, 105,5 пайыз болды.
Егіс алқаптарын әртараптандыру мақсатында күріш көлемі 600 гектарға қысқартылып, су үнемдеу технологияларын қолдану арқылы 2 370 гектар жерге басқа да дақылдар егілді.
Мал шаруашылығында да оң көрсеткіштер бар. Жыл басынан бері 4 236,5 тонна ет, 3 769,6 тонна сүт және 917,1 мың дана жұмыртқа өндірілді.
Қазір ауданда 75 мыңнан астам ірі қара, 286 079 бас қой, 29 470 бас жылқы, 2 098 бас түйе және 18 411 бас құс өсірілуде.
