USD
УАШИНГТОН. 12 қараша. Құрама Штаттар Солтүстіе альянс мүшелерін Ресейден мұнай мен газ сатып алуды тоқтатуға үндеді. Бұл туралы DW ақпарына сүйенген rast.kz хабарлайды.
АҚШ вице-президенті Джи Ди Вэнс пен мемлекеттік хатшы Марко Рубио Түркия сыртқы істер министрі Хакан Фиданмен кездесу кезінде Уашингтонның НАТО-дағы барлық одақтастарын Ресей энергиясын сатып алуды тоқтатуға тағы да шақырды. «Құрама Штаттар сонымен қатар президент Трамптың барлық НАТО одақтастарын Украинадағы жалғасып жатқан соғысты тоқтатуға көмектесу үшін Ресей энергиясын сатып алуды тоқтатуға шақыруын қайталады», – делінген АҚШ мемлекеттік департаментінің веб-сайтында 10 қараша, дүйсенбі күні жарияланған баспасөз хабарламасында.
Bloomberg өз кезегінде Түркия Қытай мен Үндістаннан кейін Ресей көп мұнайын сатып алатын үшінші ірі ел екенін атап өтеді. Сонымен қатар, Мәскеу Анкараның ең ірі табиғи газ жеткізушісі болып табылады, «және екі тарап қазіргі уақытта ұзақ мерзімді келісімшарттар бойынша келіссөздер жүргізуде, себебі қолданыстағы келісімдер жыл соңында аяқталады», – деп атап өтеді агенттік.
2025 жылдың 25 қыркүйегінде Түркия президенті Режеп Тайып Ердоғанды Ақ үйде қабылдаған кезде Трамп оны Ресей энергетикасынан бас тартуға ашық шақырған болатын. «Оның қолынан келетін ең жақсы нәрсе – Ресейден мұнай мен газ сатып алуды тоқтату», – деді Трамп Түркия президентінің қатысуымен өткен баспасөз мәслихатында тілшілерге.
Кейінірек Түркияның энергетика министрі Алпарслан Байрактар CNNTurk арнасында сөйлеген сөзінде Ресей энергиясын сатып алу туралы шешімді «жеке компаниялар, дистрибьюторлар және мұнай өңдеу зауыттары» қабылдайтынын мәлімдеді; түрік мұнай өңдеу зауыттары жақын маңдағы көздерден мұнай өңдеу үшін салынған, бұл Ресейден импортты техникалық қажеттілік те, коммерциялық шешім де етеді. Алайда Трамптың Анкараға қоңырауынан бірнеше күн өткен соң, Reuters агенттігі Ирактың солтүстігіндегі жартылай автономды Күрдістан аймағынан шикі мұнай 2,5 жыл ішінде алғаш рет Түркияға құбыр арқылы кіргенін хабарлады.
