USD
УАШИНГТОН. 11 маусым. АҚШ Әскери-әуе күштерінің генералы Алексус Гринкевич Ресейдің Балтық елдеріне ешбір шабуыл жасай алмайтынын айтты. Бұл туралы The Moscow Times ақпарына сүйенген rast.kz хабарлайды.
«Ресейлік әскери қызметшілер мен басшылық білулері керек: егер олар Балтық жағалауы елдеріне шабуыл жасамақ болса, ешқандай табысқа жете алмайды», – деді 11 маусым, бейсенбі күні Берлиндегі Ila халықаралық аэроғарыш салонында өткен баспасөз мәслихатында НАТО-ның Еуропадағы біріккен күштерінің бас қолбасшысы (SACEUR), АҚШ генералы Алексус Гринкевич.
Айтуынша, оның SACEUR басшысы ретіндегі басты міндеті Ресей Федерациясы шабуылының «ертең болмауын» қамтамасыз ету және Мәскеуге мұндай сценарийден ештеңе шықпайтынын түсіндіру болып табылады.
«Тегі, олар (ресейлік күштер. – ред.) мұнда ешқандай жетістікке жете алмайтындарын өздері де біледі, сондықтан ондай әрекетке тәуекел етпейді», – деді генерал.
Сонымен бірге ол одақтас қолбасшылықтың операциялары аясында әскерлер қозғалысын өте мұқият бақылағанын айтты.
«Мен сіз де білесіз деп ойлаймын: Ресей НАТО-мен арада қақтығыс іздемейді. Олар біздің қорғаныс альянсы екенімізді біледі және сонымен бірге бізде асимметриялық артықшылықтар да бар екенін ұмытпайды, олар қалайда бізбен тайталаса алмайды», – деп сөзін жалғастырған Алексус Гринкевич альянстың осылай ылғи алда болып қала беретінін айтты.
Бұған қоса, Гринкевич – қажет болған жағдайда – НАТО-ның барлық 32 мемлекеті «бүгін түнде-ақ» түгел түп көтеріліп, қандайда бір шабуылға да жойқын соққылармен жауап беретінін және алда мұндай дайындықтың арта түсетінін атап өтті.
