USD
АЛМАТЫ. 21 маусым. Алматыдағы Small сауда желісі супермаркеттерінің бірінде орын алған жанжалдың шуы басылмай жатып, қазақ тілін ашықтан ашық қорлаған тағы бір мәгас табыла кетті. Бұл туралы rast.kz хабарлайды.
Бірінші оқиғаның қорытындысы бойынша айыпты деп танылған Галина Лесс деген 64 жастағы алматылық әйел бір күннен кейін-ақ сот үкімімен 85 500 теңге көлеміндегі айыппұл төлеу жазасын арқалады. Алайда сол күні-ақ «эфирден» көрінген азамат «қылышын қынабынан суырып алып», қазақ тіліне қарай аттандай шабуылдап шықты. Сірә, әлгі оқиғадан кейін өзінің бейтаныс мұраттасына жақтасқысы келген болуы керек.
Әлеуметтік желіде өзін Валерий Мищенко және украин миллетінің өкілі ретінде жазып көрсеткен бұл бозым арнауын нақты бір адамға туралай бағыттаған сияқты.
«Есіңде сақта, биоқоқыс, бұл сен, өзіңнің туған Қазақстаныңда тұрып, көпшілікпен, соның ішінде менімен де, мемлекет белгілеп берген тілде ғана тілдесуге міндеттісің. Бұл жерде біз екеуміз тең жағдайдамыз – мен де сенімен өзімнің туған тілім – украин тілінде сөйлесе алмаймын. Орыс тілі – ұлтаралық қатынас тілі, ал қазақ тілімен тек ауылда ғана, – онда да егер картадан оларды таба алсаң, – қатынас жасайсың. Ал ескі Конституцияның 7-бабының 3-тармағы мен жаңаның 9-бабын өз ауылыңда 5 рет оқып шығуға кеңес беремін. Сонда басыңа бірдеңе жететін шығар», – дейді «екі дүние – бір қадам» болып, екіленіп алған @valeriy michshenko.
Әлбетте, әлеуметтік желі бірден бұған реакция білдірді. Блогерлердің біразы Алматыдағы халықаралық институт шахмат үйірмесінің жетекшісі болып істейтін Валерий Мищенконы жұмысынан босатып, өзін қылмысты жауапкершілікке тартуды ұсынды.
Мұның да жауабы көп күттірген жоқ. Белгілі блогер, қазақ тілінің жанашыры Жұлдызай Форт бүгін: «Қазақтар, сүйінші! Біз жеңдік. Кеше мен әлдеқандай мәңгүрт шахматшының бір қазақты «биоқоқыс» деп атап қорлағанын, Қазақстандағы қазақтардың барлық қазақ еместермен орыс тілінде сөйлесуге тиіс екенін, ал қазақша тек ауылда ғана сөйлесуге болатынын жазғанын атап көрсетіп едім… Мен оның жазбасын Тредстен көріп, құқық қорғау органдарына тегтеп жібердім, сосын ол туралы Youtube пен ФБ-да пост орналастырдым. Ал бүгін осы биоқоқыс мәңгүртті Алматы халықаралық шахмат мектебінің жұмыстан шығарып жібергенін естідім, ол бүгін полициядан шақырту алып, өз сөздеріне түсініктеме беріп жатыр», – деп хабарлады.
Бірақ бұдан айылын жия қойған шахматшы көрінбейді. Ол өзінің соңғы жолдауында былай деп жазыпты: «Иә, отандастар, сендер дегендеріңе жеттіңдер! Мектеп менімен жұмыс істесуін тоқтатты, мені соттың тергеуі күтіп тұр, ал мен өзім кешірім сұрап та үлгердім! Маған ел риза болуға тиіс деп ойлаймын! Мен өзімнің кешірім сұраған жазбама берілген комменттерді оқып шықтым. Іштерінде дұрыстары да бар, мен бұл кісілерге разымын. Ашулылары да кездеседі. Қазір полицияның алдында өз әрекетіме түсініктеме беріп отырмын. Мен өзімді қуғын-сүргінег түсіруді тоқтату керек деп ойлаймын. Мен айтарлықтай жаза алдым». Міне, оның кешірім сұраған түрі осы.
