USD
АЛМАТЫ. 25 маусым. Еліміз дәріханаларында қолдан жасалған дәрілерді сатуды ұйымдастырған лауазымды тұлғалар ұсталды. Бұл туралы tiek.kz ақпарына сүйенген rast.kz хабарлайды.
Паблик бұл іске қатысты фармацевтикалық бақылау департаментінің лауазымды тұлғаларының анықталып, ұсталғанын атап өтеді.
Ішкі істер министрлігі мен Ұлттық қауіпсіздік комитеті Алматы қаласында дәрі-дәрмектерді көршілес мемлекеттерден контрабандалық жолмен әкелу сызбасын ұйымдастырған 4 фармацевтикалық компанияның жолын кесті.
Олардың қатарында күшті әсер ететін дәрілік препараттар да болған, олар кейін ел аумағындағы дәріхана желісі арқылы сатылған.
Тергеу барысында іске қатысы бар тұлғалардың кейбір дәрілік заттарды заңсыз түрде қолдан жасап өндіргендері анықталды. Ең қауіптісі, ондай дәрілердің ішінде психотроптық заттар бар препараттар да болған. Контрафактілік өнімдер азаматтардың өмірі мен денсаулығына нақты қауіп төндірген, себебі олар санитарлық талаптар сақталмаған жерде дайындалған. Мұндай препараттарды қолдану адам денсаулығына қауіпті екені айтпаса да түсінікті.
Жедел-іздестіру шаралары барысында бірнеше қойма мен жасырын өндірістік цех анықталды. Сондай-ақ, бұл іске қатысты фармацевтикалық бақылау департаментінің лауазымды тұлғалары анықталып, ұсталды. Олар заңсыз әрекетті ұйымдастырушыларға ақша үшін қамқорлық көрсеткен. Олардың әрекеттері Қылмыстық кодекстің 366-бабы – пара алу бойынша сараланған.
Тауар айналымы мен қаржы қозғалысына жасалған талдау контрабанда мен контрафактқа байланысты жасырын сызбалары бар екенін растады. Алдын ала мәлімет бойынша, осы арқылы өткен жылы мемлекетке 800 миллион теңгеден астам салық пен басқа да міндетті төлемдер төленбегені аян болып отыр.
Арнайы бірлескен операция барысында заңсыз айналымнан ірі көлемдегі ақша қаражаттары, ондаған мың қорап жалған дәрі-дәрмек тәркіленді. Олардың ішінде айналымы шектеулі препараттар да бар. Сондай-ақ дәрілерді өндіруге арналған жабдықтар мен шикізат алынды. Бұл жалған медициналық өнімдердің заңды нарыққа түсуінің алдын алуға мүмкіндік берді.
Қылмыстық сызбаны ұйымдастырушылар мен олардың сыбайластары уақытша ұстау оқшаулағышына қамалды.
Қазір ұсталғандар үстерінен сотқа дейінгі тергеу жүріп жатыр. Заңсыз әрекетке қатысы бар барлық тұлғаларды және дәрі-дәрмектердің жеткізу арналары, соның ішінде шетелден келетін жолдары да анықталу үстінде.
