USD
АЛМАТЫ. 5 қыркүйек. Бүгін Алматыдағы Орталық стадионда өтетін испан әншісі Энрике Иглесиастың концерті кезінде 2 мыңға жуық полиция қызметкері кезекшілік атқарады. Бұл туралы Алматы қаласы әкімі баспасөз қызметінің дерегіне сүйенген rast.kz хабарлайды.
Концерт 20:00 сағатта басталады.
«Алматыда Энрике Иглесиастың концерті кезінде қауіпсіздік шаралары күшейтіледі. Орталық стадион мен оған іргелес аумақта 2 мыңға жуық полиция қызметкері жұмылдырылады», – делінген хабарламада.
Хабарланғандай, тәртіп сақшылары күшейтілген режимде жұмыс істеп, қоғамдық тәртіпті, көрермендердің қауіпсіздігін және ықтимал төтенше жағдайларға жедел ден қоюды қамтамасыз етуге тиіс.
Стадион маңында көлік қозғалысына уақытша шектеу енгізілуі мүмкін. Осыған байланысты көрермендерге бағытын алдын ала жоспарлап, ертерек келу ұсынылуда.
Концертке кіру сағат 16:00-ден басталады. Стадион есіктері Абай даңғылы мен Байтұрсынов көшесі қиылысы жағынан ашылады. VIP Standing санатындағы билет иелері үшін кіру Сәтбаев көшесі беткейінен ұйымдастырылады. Кіреберісте тексеру жүргізілетіндіктен, келушілерге ережемен алдын ала танысып, тыйым салынған заттарды өзімен бірге алмау ескертіледі.
Қоғамдық көлік, оның ішінде метро қалыпты режимде жұмыс істейді. Концерт аяқталғаннан кейін көрермендер үшін әуежай, Орбита, Алматы-1, Райымбек даңғылы – Алатау көшесі және «Алматы Арена» бағыттары бойынша қосымша шаттл қойылады.
«Ұйымдастырушылар мен құқық қорғау органдары көрермендерді қауіпсіздік ережесін сақтауға және полиция қызметкерлері мен бақылаушылардың талабын орындауға шақырады», – делінген мәтбұғат парақшасында.
